საქართველოს პარლამენტის თავმჯდომარემ დავით ბაქრაძემ იერუსალიმის ჯვრის მონასტრის დაბრუნების საკითხთან დაკავშირებით საქართველოს პრეზიდენტის  ინიციატივაზე ინფორმაცია რელიგიის საკითხებში ისრაელის მინისტრს იაკობ მარგს მიაწოდა .
"ჯვრის მონასტერი იერუსალიმის საპატრიარქოს მფლობელობაშია და ბუნებრივია, რომ მათთან ვაწარმოებთ ძირითად მოლაპარაკებებს, მაგრამ ძალიან მნიშვნელოვანია, რომ ისრაელის სახელმწიფო და მთავრობა ამ პროცესში ინფორმირებული და ჩართული იყოს" - განაცხადა ბაქრაძემ მინისტრთან შეხვედრის შემდეგ.
ბაქრაძის თქმით, ისრაელის მინისტრმა მზადყოფნა გამოთქვა, რომ საკუთარი კომპეტენციისა და მანდატის ფარგლებში შეეცდება ქართულ მხარეს დაეხმაროს, რათა საბოლოოდ ყველა მხარისთვის მისაღები გადაწყვეტილება იქნას მიღებული.
იაკობ მარგმა შეხვედრის დასრულების შემდეგ ჟურნალისტებს განუცხადა, რომ ისრაელის ხელისუფლება მზად არის დაეხმაროს ქართულ მხარეს მოლაპარაკებების წარმართვაში.
"საქართველოს პარლამენტის თავმჯდომარესთან ჯვრის მონასტრის თემაზე ვისაუბრეთ. ეს პრობლემატური და ფრთხილი საკითხია. სავარაუდოდ, მასზე საუბარი საქართველოს პრეზიდენტსა და ჩვენი ქვეყნის მეთაურს შორისაც გაიმართება. ამ საკითხში სამი მხარეა ჩართული. ვფიქრობ ისრაელმა თავისი წვლილი უნდა შეიტანოს, რომ მოლაპარაკებები ყველა მხარისთვის მისაღები შედეგით დასრულდეს. პროცესში ჩართულია საბერძნეთის ეკლესიაც. ჩვენ ყველაფერს გავაკეთებთ ქართული მხარის დასახმარებლად" - განაცხადა მარგმა.
შეხვედრაზე მხარეებმა, ასევე ორ ქვეყანას შორის ურთიერთობებსა და სავიზო რეჟიმის გამარტივების აუცილებლობის საკითხზე ისაუბრეს.
საქართველოს პარლამენტის თავმჯდომარემ დავით ბაქრაძემ იერუსალიმში ქართული სახლი მოინახულა და იქ მოღვაწე ქართველ დედებს ღვთისმშობლის ხატი გადასცა.
ოფიციალური შეხვედრები გრძელდება. დღეს ბაქრაძე ქნესეთში თავის კოლეგას და ქნესეთის წევრებს შეხვდება.