საპარლამენტო უმრავლესობის ლიდერი პეტრე ცისკარიშვილი ოპოზიციას თეატრალიზებული შოუს მოწყობის მცდელობაში ადანაშაულებს.  

"თქვენ რომ შოუში და თეატრალიზებულ წარმოდგენაში კასტინგები მოაწყოთ და ვიღაცის კეთილგანწყობა მოიპოვოთ, აღმასრულებელი ხელისუფლება, მასში მთავრობა და მინისტრები ნამდვილად ვერ ჩაერთვებიან" – მიმართა ცისკარიშვილმა ფრაქცია "ერთობა სამართლიანობისთვის" წევრებს.

ოპოზიცია სამთავრობო საათზე ორი მინისტრის – ვანო მერაბიშვილისა და ზურაბ ადეიშვილის, ასევე, მთავარი პროკურორისა და კონტროლის პალატის თავმჯდომარის მისვლას ითხოვს.

პარლამენტის პლენარულ სხდომაზე გამოსვლისას ცისკარიშვილმა განმარტა, რომ ოპოზიციის მოთხოვნა კარგად არ არის ჩამოყალიბებული, შეკითხვები მიმართული არ არის იმ ადრესატებისადმი, ვის მოწვევასაც ითხოვენ.

ცისკარიშვილი აღნიშნავს, რომ რეგლამენტში მთავარი პროკურორის მიწვევა საერთოდ არ არის აღწერილი.

მისივე თქმით, აღმასრულებელი ხელისუფლება ოპოზიციის შოუში მონაწილეობას ვერ მიიღებს.