"სახალხო კრების" წარმომადგენელი ირაკლი ბათიაშვილი "ქართული ოცნების" პრესსპიკერის მაია ფანჯიკიძის განცხადებას, რომ კოალიცია "სახალხო კრებასთნ" ნინო ბურჯანაძის გარეშე ითანამშრომლებს, არაკორექტულს და გაუგებარს უწოდებს.

"არ მესმის "ქართული ოცნების" "ერთი ბარტყი გადმომიგდეს" პოზიცია. ეს ჩვენთვის მიუღებელია" - განუცხადა ბათიაშვილმა "ნიუსპრესს".

მისი თქმით, ნინო ბურჯანაძე "სახალხო კრების" ისეთივე ძალაუფლების მქონე წევრია, როგორც ყველა სხვა. შესაბამისად, საბჭოს ნესბიმიერი წევრის გარეშე "ქართულ ოცნებასთან" თანამშრომლობა მათთვის მიუღებელია.

"ჩვენთან ზნეობა უფრო მაღლა დგას ვიდრე პოლიტიკა. ნინო არის მნიშვნელოვანი ფიგურა, რომელსაც შეუძლია უდიდესი წვლილი შეიტანოს ქვეყნის განვითარების საქმეში" - აღნიშნა ბათიაშვილმა.

თავად ნინო ბურაჯანაძემ კი, რომელიც დღეს "სახალხო კრების" საგანგებო ბრიფინგზე იმყოფებოდა, აღნიშნულ საკითხზე კომენტარი არ გააკეთა.

დღევანდელ ტრადიციულ ბრიფინგზე "ქართული ოცნების" პრესსპიკერმა მაია ფანჯიკიძემ განაცხადა, რომ ბიძინა ივანიშვილისა და "სახალხო კრების" შეხვედრა ნინო ბურჯანაძის გარეშე ჩატარდა და ყოველი მომდევნო შეხვედრაც ბურჯანაძის გარეშე წარიმართება.