საქართველოში წარმოებული სოფლის მეურნეობის პროდუქცია სამრეწველო გადამუშავებამდე დღგ–სგან თავისუფლდება.  აღნიშნულის შესახებ ცვლილებები საგადასახადო კოდექსში შევა.
ცვლილებების პროექტი დღეს პარლამენტის აგრარულ საკითხთა და საფინანსო–საბიუჯეტო კომიტეტების ერთობლივ სხდომაზე განიხილეს.
კანონპროექტის თანახმად, საქართველოში წარმოებული სოფლის მეურნეობის პროდუქციის მიწოდება მის სამრეწველო გადამუშავებამდე (სასაქონლო კოდის შეცვლამდე) დღგ–სგან თავისუფლდება. ცვლილება შეეხება, ასევე საქართველოში წარმოებულ მსხვილფეხა რქოსანი პირუტყვის, ღორის, ცხვრის და თხის ახალი ან გაცივებული ხორცის და ყველის მიწოდებას.
ფინანსთა მინისტრის მოადგილის რუსუდან კემულარიას განცხადებით, აღნიშნული ცვლილებები სოფლის მეურნეობის დარგის განვითარებას შეუწყობს ხელს.
ახალ კანონპროექტს პარლამენტის სხდომაზე მომავალ კვირას განიხილავენ.