საქართველოს პრემიერ-მინისტრი ბიძინა ივანიშვილი, დღეს, დავით აღმაშენებლის სახელობის ეროვნული თავდაცვის აკადემიის მსმენელებს შეხვდა.

პრემიერ-მინისტრმა სტუდენტებს ნიკოლოზობა მიულოცა და თავდაცვისა და უსაფრთხოების სფეროში დაგეგმილი რეფორმები გააცნო.

პრემიერ-მინისტრის განცხადებით, ქვეყანას განათლებული ჯარი უნდა იცავდეს. მისივე თქმით, საქართველოს მთავრობა ამ მიმართულებით სამხედრო განათლების სფეროში ახალი ინვესტიციების ჩადებას გეგმავს.

„ახალი ხელისუფლების ერთ-ერთ მთავარ პრიორიტეტს განათლება წარმოადგენს. დღეს სიმბოლურია, რომ განათლების სისტემაში პირველად თქვენთან მოვედი. წარმატების მისაღწევად საჭიროა განათლებული საზოგადოება გვყავდეს. ის, რომ ჩვენს ხალხს, ჩვენს საზოგადოებას სჭირდება ღირსეული დაცვა - ამასაც განათლებული ჯარი უნდა აკეთებდეს. ჩვენ უნდა მოვახერხოთ და ავაშენოთ ისეთი ქვეყანა, ისეთი ჯარი და გვყავდეს ისეთი განათლებული და ღირსეული ოფიცრები, რომ საქართველოს დაცვაში მათ პრაქტიკულად პრევენციის როლი შეასრულონ. ჯარისკაცი იმისთვისაა, რომ საკუთარ სამშობლოს ემსახუროს და მისი უსაფრთხოება დაიცვას“ - განაცხადა საქართველოს პრემიერ-მინისტრმა აკადემიის სტუდენტებთან შეხვედრისას.

აკადემიაში, პრემიერ-მინისტრთან ერთად თავდაცვის მინისტრი ირაკლი ალასანია და განათლებისა და მეცნიერების მინისტრი გიორგი მარგველაშვილი იმყოფებოდნენ. მათ ეროვნული თავდაცვის აკადემიის ინფრასტრუქტურა და მსმენელების საცხოვრებელი პირობები დაათვალიერეს. მინისტრებს მეგზურობა აკადემიის კომენდანტმა ვიცე-პოლკოვნიკმა ნიკოლოზ აგლაძემ გაუწია.

„თავდაცვის სამინისტროს ერთ-ერთი მთავარი პრიორიტეტია ჰყავდეს განათლებული, ინტელექტუალურად განვითარებული და მოაზროვნე ჯარი. ძალიან მნიშვნელოვანია, რომ დღეს ეროვნულ თავდაცვის აკადემიას პრემიერ-მინისტრი ეწვია. ჩვენ საკმაოდ დიდი შესაძლებლობები გვაქვს, რომ ასეთი განათლება მივცეთ ჩვენს მსმენელებს. პროფესია ჯარისკაცი არ იქნება მხოლოდ ვიწროდ სამხედრო პროფესიით შეზღუდული, მათ სერიოზული სამოქალაქო განათლების მიღების შესაძლებლობა ექნებათ“ - განაცხადა თავდაცვის მინისტრმა ირაკლი ალასანიამ მედიის წარმომადგენლებთან.