პარლამენტის საფინანსო-საბიუჯეტო კომიტეტმა, მხარი არ დაუჭირა პავლე კუბლაშვილის მიერ, კომიტეტის სხდომაზე წარმოდგენილ ფრაქცია „ნაციონალური მოძრაობის“ ალტერნატიულ კანონპროექტს, რომელიც საგადასახადო კოდექსში ცლილებების შეტანას ითვალისწინებს.
კუბლაშვილის თქმით, მთავრობის მიერ შემოთავაზებული დაუბეგრავი მინიმუმის პრინციპი მხოლოდ მაშინ იქნება მისაღები, თუკი ის მოსახლეობის ფართო ფენებზე გავრცელდება. ამასთანავე, ფრაქცია ითხოვს, რომ დაუბეგრავი მინიმუმი გადასახადების კლების პარალელურად უნდა შემოვიდეს.
„თქვენ, როდესაც ხელისუფლებაში იყავით, ბევრჯერ გქონდათ საშუალება, რომ საშემოსავლო გადასახადი შეგემცირებინათ, მაგრამ ეს არ გააკეთეთ. დაუბეგრავი მინიმუმის შემოღება ბევრ ადამიანს მისცემს შეღავათს. ჩვენ ჩვენი ეკონომიკური პილიტიკა გვაქვს ჩამოყალიბებული, რომელსაც ნაბიჯ-ნაბიჯ შევასრულებთ ადამინთა საკეთილდღეოდ“ - განაცხადა საფინანსო-საბიუჯეტო კომიტეტის თავმჯდომარემ, დავით ონოფრიშვილმა.
საბოლოოდ, ალტერნატიულ წინადადებას, მხარი მხოლოდ კომიტეტის 4-მა წევრმა დაუჭირა, წინააღმდეგი კი - 6 დეპუტატი იყო.
დღესვე, კომიტეტის წევრებმა ასევე პირველი მოსმენით განიხილეს კანონპროექტი „ბუღალტრული აღრიცხვისა და ფინანსური ანგარიშგების აუდიტის შესახებ“ საქართველოს კანონში ცვლილებებისა და დამატებების შეტანის თაობაზე“, რომელიც, საკანონმდებლო ინიციატივის წესით დავით ონოფრიშვილმა წარადგინა. კომიტეტის წევრებმა კანონპროექტს მხარი დაუჭირეს.