რეინტეგრაციის საკითხებში სახელმწიფო მინისტრის პაატა ზაქარეიშვილი, დღეს საქართველოში ლატვიის ელჩს ელიტა გაველეს შეხვდა.
შეხვედრა გაცნობითი ხასიათის იყო.
როგორც პაატა ზაქარეიშვილმა, შეხვედრის დასრულების შემდეგ აღნიშნა, შეხვედრაზე ევროკავშირთან საქართველოს ურთიერთობაზე, მჭიდრო თანამშრომლობასა და ევროკავშირის მიერ წარმოებულ, არაღიარების ეფექტურ პოლიტიკაზე ისაუბრეს. სახელმწიფო მინისტრმა და ელჩმა იმსჯელეს ასევე რუსეთთან ურთიერთობაში ლატვიის გამოცდილებაზე, რომელიც პაატა ზაქარეიშვილის შეფასებით, საქართველოსთვისაც სასარგებლო იქნება.
” განვიხილეთ ლატვიის გზა ნატოსა და ევროკავშირში ინტეგრაციის მიმართულებით, რომელიც ამ სახელმწიფომ რუსეთისგან მომდინარე გამოწვევების ფონზე განვლო. რუსეთთან ურთიერთობა ლატვიისთვისაც რთული იყო. ამის მიუხედავად, ამ ქვეყანამ მაინც მოახერხა კონსტრუქციული ნაბიჯების გადადგმა და ისე გაწევრიანდა ამ სტრუქტურებში, რომ რუსეთთან თანამშრომლობისა და პარტნიორობის შესაძლებლობაც შეინარჩუნა. სწორედ ლატვია არის დამაჯერებელი პასუხი მათთვის, ვისაც ნატო-სა და ევროკავშირისკენ სწრაფვისა და რუსეთთან ურთიერთობის შეთავსება შეუძლებლად მიაჩნია” - განაცხადა პაატა ზაქარეიშვილმა.