ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრი ალექსი პეტრიაშვილი, დღეს ევროპის საბჭოს საპარლამენტო ასამბლეის წევრი ქვეყნების ნაკისრი მოვალეობებისა და ვალდებულებების შესრულების კომიტეტის (მონიტორინგის კომიტეტი) თანამომხსენებელს ბორის ცილევიჩსა და კომიტეტის მდივანს ბას კლეინს შეხვდა.
სამინისტროს პრესსამსახურის ინფორმაციით, შეხვედრაზე სახელმწიფო მინისტრმა, ევროსაბჭოს საპარლამენტო ასამბლეის მიერ მიღებულ რეზოლუციებთან დაკავშირებით, რომლებიც აფიქსირებს რუსეთის მიერ საქართველოს ტერიტორიების ოკუპაციასა და ადექვატურად ასახავს ამ რეგიონებში მიმდინარე მილიტარიზაციის პროცესს, მადლიერება გამოხატა.
შეხვედრაზე საუბარი შეეხო აგრეთვე ოკუპირებულ ტერიტორიებზე ადამიანის უფლებათა დაცვის კუთხით შექმნილ უმძიმეს ვითარებასაც. სახელმწიფო მინისტრის განცხადებით, მნიშვნელოვანია, რომ ევროპის საბჭომ სრულად და ეფექტურად გამოიყენოს მის ხელთ არსებული მექანიზმები ოკუპირებულ ტერიტორიებზე ადამიანის უფლებათა დაცვის მონიტორინგისათვის.
შეხვედრაზე ისაუბრეს აგრეთვე საქართველო-რუსეთის ურთიერთობის დარეგულირების აუცილებლობაზეც.