თბილისის საკრებულოს ფრაქცია "ქრისტიან-დემოკრატების" თავმჯდომარე ზაზა გაბუნია, თბილისის ბიუჯეტის 2009-10-11-12 წლებში მუხლ "სხვა ხარჯებში" არსებული თანხების გახარჯვის კანონიერებასთან დაკავშირებით, ფინანსური გამოძიების ჩატარების აუცილებლობაზე საუბრობს.
როგორც გაბუნიამ დღეს გამართულ პრესკონფერენციაზე განაცხადა, ოთხი წლის მანძილზე, სულ თბილისის ბიუჯეტში მუხლ "სხვა ხარჯებში" 593 მილიონი ლარი იყო.
"მე ვაპირებ ინიციატივით მივმართო საქართველოს პარლამენტს იმისათვის, რომ კანონში შევიდეს ცვლილება, რომლის თანახმადაც, ტერმინის "სხვა ხარჯები" გამოყენება აიკრძალება რადგან ეს უსათაურო, არამიზნობრივი მუხლი ფულის მხარჯველ დაწესებულებას, აძლევს თანხების გაუმჭვირვალედ ხარჯვის სრულ შესაძლებლობას. ამასთან მე მივმართავ ფინანსათა სამინისტროს რომ დაიწყოს გამოძიება 2009-10-11-12 წლებში თბილისის ბიუჯეტში, მუხლ სხვა ხარჯებში კონცენტრირებული 593 მილიონი ლარის ხარჯვის მართლზომიერების შესწავლის მიზნით " - განაცხადა გაბუნიამ.
მისივე ინფორმაციით, თბილისის 2013 წლის ბიუჯეტის პროექტში, რომელიც მერიამ განხილვისთვის საკრებულოში გუშინ შეიტანა, მუხლ "სხვა ხარჯებში" 110 მილიონი ლარია ფიქსირებული.