პოლონეთის სენატის მარშალი ბოგდან ბორუსევიჩი, საქართველოს ახალ ხელისუფლებას პოლიტიკური შურისძიებისგან თავის შეკავებისკენ მოუწოდებს.

ამის შესახებ განცხადება ბორუსევიჩმა კავკასიოლოგთა საერთაშორისო კონფერენციის მუშაობის დროს სიტყვით გამოსვლისას გააკეთა.
კონფერენციაში მონაწილეობა, საქართველოს პრეზიდენტმა მიხეილ სააკაშვილმაც მიიღო.

პრეზიდენტის პრესსამსახურის ინფორმაციით, სააკაშვილის გამოსვლამდე აუდიტორიას, სწორედ პოლონეთის სენატის მარშალმა ბოგდან ბორუსევიჩმა მიმართა, რომელმაც საქართველოს დემოკრატიული განვითარების თაობაზე ისაუბრა და აღნიშნა, რომ მიღწეული პროგრესი კვლავაც უნდა გაგრძელდეს.

„საქართველო არის დემოკრატიული სახელმწიფო და ეს ქვეყანაში გამართულმა ბოლო არჩევნებმაც დაადასტურა. საქართველო არის ქვეყანა, რომელშიც დაცულია კანონის უზენაესობა. არჩევნების შედეგად მოსულ მთავრობას უდიდესი პასუხისმგებლობა ეკისრება. ამიერიდან, ისინი იქნებიან პასუხისმგებელი იმაზე, თუ როგორ აღიქვამენ საქართველოს იმიჯს ევროპაში. გამარჯვებულმა ძალამ კანონის შესაბამისად უნდა იმოქმედოს. შურისძიება არ უნდა იყოს მისი მამოძრავებელი, მით უმეტეს, იმ ძალის მიმართ, რომელმაც არჩევნებში დამარცხება აღიარა“ - განაცხადა მიმართვისას სენატის მარშალმა.