პარტია „თავისუფალი საქართველოს“ კახეთის რეგიონული ორგანიზაციის თავმჯდომარე გიორგი მოსიაშვილი, თელავის მუნიციპალიტეტის ახალი გამგებლის, ზურაბ ყურაშვილის ქმედებების კანონიერებას ეჭვქვეშ აყენებს.

ამის შესახებ პარტიის განცხადებაშია ნათქვამი.

„სულ რაღაც ორი კვირის წინ თელავის მუნიციპალიტეტში განხორციელდა საკადრო ცვლილება, რაც გამოიხატა ზურაბ ყურაშვილის მუნიციპალიტეტის გამგებლად დანიშვნაში. მის დანიშვნას საზოგადოების მხრიდან არაერთგვაროვანი შეფასებები მოჰყვა, რაც გარკვეულწილად უკავშირდება მის, ხშირ შემთხვევაში არაკომპეტენტურ და კანონთან შეუსაბამო გადაწყვეტილებებს. კერძოდ , მან გამგებლის მოადგილეთა დანიშვნაზე ბრძანებები კანონდარღვევით გამოსცა. ყურაშვილმა არ გაითვალისწინა კანონის მოთხოვნა, რომლის თანახმადაც, პირი თანამდებობაზე შეიძლება მხოლოდ კონკურსის შედეგად დაინიშნოს და საკუთარი მოადგილეები უკანონოდ დანიშნა.

ასევე აღმაშფოთებელია მისი განცხადებები, სადაც ის პირდაპირ აფიქსირებს დადებით პოზიციას ე.წ „დაუწერელი კანონების“ მიმართ. ვთვლით, რომ აღნიშნული მიუღებელია დემოკრატიული სახელმწიფოს საჯარო მოხელის მხრიდან“ - აცხადებენ „თავისუფალ საქართველოში“.