საქართველოს პრეზიდენტის, მიხეილ სააკაშვილის განცხადებით, როგორი მთავრობაც არ უნდა იყოს ქვეყანაში, შეიარაღებული ძალები პოლიტიკის მიღმა უნდა რჩებოდეს.

ამის შესახებ პრეზიდენტმა გაერთიანებული შტაბის უფროსად ირაკლი ძნელაძის წარდგენის დროს განაცხადა.

"როგორი მთავრობაც არ უნდა იყოს საქართველოში, როდესაც ხალხის მოწოდებაა კურსის გაგრძელება ნატო-სკენ და ქვეყნის დაცვისკენ - ტერიტორიული მთლიანობა ჩვენთვის ხელშეუხებელი და წმიდათა წმინდაა, შეიარაღებული ძალები პოლიტიკის მიღმა უნდა რჩებოდეს და მუდმივად უნდა ადგეს უწყვეტი განვითარების გზას. ასეთი იყო ჩემი კურსი ყოველთვის, პირველივე დღიდან და ლოგიკურად, ასეც უნდა გაგრძელდეს მომავალში" - განაცხადა მიხეილ სააკაშვილმა.

გაერთიანებული შტაბის ახალი უფროსის წარდგენა თავდაცვის სამინისტროში გაიმართა და მას თავდაცვის მინისტრი ირაკლი ალასანია და გაერთიანებული შტაბის წარმომადგენლები ესწრებოდნენ. პოლკოვნიკი ირაკლი ძნელაძის კანდიდატურა ქვეყნის პირველ პირსა და თავდაცვის მინისტრს შორის ერთობლივი კონსულტაციების საფუძველზე შეირჩა. ქვეყნის პირველმა პირმა ირაკლი ძნელაძეს წარმატებები უსურვა და აღნიშნა, რომ ქვეყანაში არსებული რთული ვითარებიდან გამომდინარე, ამ თანამდებობაზე დანიშვნით, მას ძალზე საპასუხისმგებლო მისია ეკისრება.