"დემოკრატიული მოძრაობა-ერთიანი საქართველო" ხელისუფლების მხრიდან რეპრესიების და ზეწოლის ახალ ტალღაზე საუბრობს.

"დემოკრატიული მოძრაობის" ლიდერის ნინო ბურჯანაძის განცხადებით, აღნიშნული ქმედებები მას შემდეგ დაიწყო, რაც მოძრაობამ მომავალ საპარლამენტო არჩევნებში შესაძლო მონაწილეობის შესახებ განაცხადა.

მისი თქმით, ყველა იმ პირზე, ვინც ბოლო პერიოდში პარტიის ანგარიშზე საწევრო შეიტანა ან შემოწირულობა გააკეთა, პოლიციის მხრიდან ზეწოლა ხორციელდება, მათ სახლებში აკითხავენ.

"ისინი განყოფილებებში მიჰყავთ და შანტაჟისა და ზეწოლის გზით, ხელისუფლებისთვის მომგებიანი განცხადების გაკეთებას აიძულებენ, თითქოს, მათ ვინმე ფულს აძლევს და პარტიის ანგარიშზე ჩარიცხვას აიძულებს", - განაცხადა ბურჯანაძემ.

ნინო ბურჯანაძის თქმით, კონტროლის პალატა საბიუჯეტო სახსრების ხარჯვის შემოწმების ნაცვლად, პოლიტიკური შეკვეთების შემსრულებელი გახდა.

იგი აცხადებს, რომ არჩევნების მოახლოებასთან ერთად, სააკაშვილის რეჟიმი "დემოკრატიული მოძრაობის" პოლიტიკური ველიდან განდევნას აქტიურად ცდილობს.

"დემოკრატიული მოძრაობა" მიმართავს საქართველოში აკრედიტებულ დიპლომატიურ კორპუსს - შესაბამისი რეაგირება მოახდინოს ხელისუფლების მხრიდან მათ წინააღმდეგ განხორციელებულ ქმედებებზე. მოძრაობა ასევე, საარჩევნო კანონმდებლობის შეცვლის აუცილებლობასაც უსვამს ხაზს.