საგარეო საქმეთა მინისტრის პირველი მოადგილის, დავით ზალკალიანის ბრიუსელში ვიზიტის ფარგლებში, საქართველოსა და ევროკავშირის შორის ასოცირების შესახებ შეთანხმების ტექსტის შემუშავების მიზნით მოლაპარაკებების მე-12 პლენარული სესია გაიმართა.

საგარეო საქმეთა სამინისტროს პრეს-სამსახურის ინფორმაციით, შეხვედრაზე მხარეებმა განიხილეს - პოლიტიკური დიალოგი და რეფორმა, ერთიანი საგარეო და უსაფრთხოების პოლიტიკის სფეროში თანამშრომლობა (CFSP), მართლმსაჯულება, თავისუფლება და უსაფრთხოება (JFS) და ინსტიტუციური, ზოგადი და დასკვნითი დებულებები. ასევე განიხილეს დარგობრივი თანამშრომლობის თავების შეთანხმების კუთხით არსებული მდგომარეობა და თავისუფალ სავაჭრო სივრცეზე (DCFTA)მოლაპარაკებების მიმდინარეობა.

საქართველოსა და ევროკავშირს შორის ასოცირების შესახებ მომავალი შეთანხმება ჩაანაცვლებს საქართველოსა და ევროკავშირს შორის არსებულ „პარტნიორობისა და თანამშრომლობის შესახებ შეთანხმებას“ და ითვალისწინებს საქართველოსა და ევროკავშირის შორის ურთიერთობების მნიშვნელოვნად გაღრმავებას და თანამშრომლობას. ეს შეთანხმება საქართველოს ევროკავშირთან პოლიტიკური ასოცირებისა და ეტაპობრივი ეკონომიკური ინტეგრაციის შესაძლებლობას მისცემს.

სამინისტროს ინფორმაციითვე, დელეგაციაში საქართველოს შესაბამისი უწყებების წარმომადგენლები იღებდნენ მონაწილეობას. ევროპული მხრიდან დელეგაციას ევროპული საგარეო ქმედებათა სამსახურის (EEAS) რუსეთის, აღმოსავლეთ პარტნიორობის, ცენტრალური აზიის, რეგიონული თანამშრომლობისა და ეუთო-ს სამმართველოს დირექტორი, გურან ვიგანდი ხელმძღვანელობდა.