ესტონეთის რესპუბლიკაში სამუშაო ვიზიტით მყოფი, ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრი ალექსი პეტრიაშვილი ესტონეთის პრემიერ-მინისტრ ანდრუს ანსიპს, საგარეო საქმეთა მინისტრ ურმას პაეტს და ესტონეთის პარლამენტის საგარეო ურთიერთობებისა და ევროკავშირის საქმეთა კომიტეტების თავმჯდომარეებს მარკო მიჰკელსონსა და ტაავი როივას შეხვდა.
სამინისტროს პრესსამსახურის ინფორმაციით, შეხვედრებზე მხარეებმა განიხილეს საქართველო-ესტონეთის ორმხრივი ურთიერთობების გაღრმავების საკითხები სხადასხვა სფეროებში. პეტრიაშვილის განცხადებით, საქართველოს საგარეო-პოლიტიკური კურსი უცვლელია და ევროატლანტიკური ინტეგრაცია ახალი მთავრობის პრიორიტეტს წარმოადგენს. სახელმწიფო მინისტრმა მადლიერება გამოხატა მეგობარი ქვეყნის - ესტონეთის აქტიური მხარდაჭერისათვის ევროპულ და ევროატლანტიკურ სტრუქტურებში ინტეგრაციის გზაზე და ხაზი გაუსვა ამ პროცესში ესტონეთის გამოცდილების გაზიარების მნიშვნელობას.
ასევე მინისტრმა მადლობა გადაუხადა ესტონეთის მხარეს უცვლელი პოზიციისათვის საქართველოს სუვერენიტეტისა და ტერიტორიული მთლიანობის მხარდაჭერისა და საქართველოს ოკუპირებული რეგიონების არაღიარების პოლიტიკის მტკიცედ გატარებასთან დაკავშირებით. ამ კონტექსტში ალექსი პეტრიაშვილმა განსაკუთრებულად აღნიშნა ესტონეთის მიერ ნეიტრალური სამგზავრო დოკუმენტის აღიარება და ასევე, საქართველოს ოკუპირებულ ტერიტორიებზე ევროკავშირის სადამკვირვებლო მისიის მანდატის გაგრძელებაში მხარდაჭერა.
ესტონეთის მხარესთან შეხვედრებზე სახელმწიფო მინისტრმა ახლადარჩეული მთავრობის ერთ-ერთ მთავარ პრიორიტეტზე - საქართველოს ტერიტორიების დეოკუპაციის საკითხზე გაამახვილა ყურადღება და აღნიშნა, რომ საქართველოს ხელისუფლება შეეცდება საერთაშორისო საზოგადოების კონსოლიდაციის უზრუნველყოფას, საერთაშორისოდ აღიარებულ საზღვრებში საქართველოს ტერიტორიული მთლიანობისა და სუვერენიტეტის მხარდასაჭერად.