საქართველოს საგარეო საქმეთა ყოფილი მინისტრი სალომე ზურაბიშვილი ახალ ხელისუფლებას ურჩევს ყურადღება მიაქციონ მათ მიმართ უცხოურ მედიაში გაჩაღებულ ნეგატიურ კამპანიას, რომლის უკანაც ყოფილი ხელისუფლების ლობისტი კომპანიები და საელჩოს წარმომადგენლები დგანან.

ამის შესახებ ზურაბიშვილი "ფეისბუქის" ოფიციალურ გვერდზე წერს.

"ფრანგული პრესა აჭრელებულია ჩვენს მიერ არჩეული ხელისუფლების მწვავე კრიტიკით. ალბათ მიხედვის დროა. ნაცებს სხვა საქმე არა აქვთ და ამ საქმეს გულმოდგინებით ეკიდებიან. ახლახან ახალი ლობისტური ფირმა შექმნეს თუ დაიქირავეს. ამაზე ცხადია საელჩო არც რეაქციას იძლევა არც თბილისს ატყობინებს. შეიძლება ვინმე ფიქრობდეს, რომ ეს უმნიშვნელოა მაგრამ ეს უარყოფით სურათის შექმნაა, რომელიც საქართველოსთვის უფრო საყურადღებოა ვიდრე სტრასბურგში ცეკვა თამაში. ანუ ჩვენი ქვეყნის და ახალი მთავრობის დემოკრატიულობის ეჭვის ქვეშ დაყენება" - წერს ზურაბიშვილი თავის ოფიციალური "ფეისბუქის" გვერდზე.

მისივე თქმით, თითქმის ანალოგიური სურათია ყველგან და სააკაშვილს ადგილებზე ჯერ კიდევ მყოფნი ელჩები და ახალი თუ ძველი ლობისტები ემსახურებიან. "ამ ფონზე კი ახალ ხელისუფლებას არავინ არ იცავს. უცხო პრესას ყურადღებასაც არ ვაქცევთ, ვითომც არარსებობდეს როცა ნაციონალები მთელ ენერგიას ამ მიმართულებით ხარჯავენ. რატომ არავინ არ უხსნის ივანიშვილს რომ ძველი ელჩები ეხლავე მოსაშორებელია და უცხოეთში მისი პიროვნება და პოლიტიკა წარმოსაჩენია, ეს უცოდინარობაა თუ დივერსია" - კითხულობს ზურაბიშვილი.