ლიტვის ქალაქ ვილნიუსში მიმდინარე კონფერენციაში „ათი წელი პრაღის სამიტის შემდეგ“, საქართველოს ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრი ალექსი პეტრიაშვილი სიტყვით გამოვიდა.

სამინისტროს პრესსამსახურის ინფორმაციით, მინისტრმა სიტყვით გამოსვლისას ხაზგასმით აღნიშნა, რომ საქართველოს ნატო-ში გაწევრიანება წარმოადგენს და რჩება ახალი ხელისუფლების საგარეო და უსაფრთხოების პოლიტიკის მთავარ პრიორიტეტად. მანვე იმედი გამოთქვა, რომ ის პროგრესი, რომელიც საქართველომ აჩვენა ხელისუფლების არჩევნების გზით გადაცემის თვალსაზრისით, ადექვატურად აისახება ნატო-ს უახლეს გადაწყვეტილებებზე.

„საქართველომ წარმატებით ჩააბარა კიდევ ერთი მნიშვნელოვანი ტესტი, როდესაც საქართველოს ისტორიაში პირველად შეიცვალა მთავრობა არჩევნების გზით, რაც თავისთავად მნიშვნელოვანია საქართველოს დემოკრატიისთვის და კიდევ ერთი მნიშვნელოვანი წინ გადადგმული ნაბიჯია საქართველოს ნატო-ში ინტეგრაციის პროცესში.საქართველოს პროგრესი დღემდე სიმეტრიულად აისახებოდა ნატო-ს განცხადებებსა და დოკუმენტებში, რასაც ჩვენ ძლიერ ვაფასებთ და მივიჩნევთ, რომ ძალიან მნიშვნელოვანია ინტეგრაციის პროცესის განვითარებისათვის“-აღნიშნა სახელმწიფო მინისტრმა.

ალექსი პეტრიაშვილთან ერთად კონფერენციის მონაწილეებს სიტყვით მიმართეს ლიტვის რესპუბლიკის საგარეო საქმეთა და თავდაცვის მინისტრებმა.

ვიზიტის ფარგლებში დაგეგმილია სახელმწიფო მინისტრის სხვა ორმხრივი შეხვედრებიც.