საქართველოს პრემიერ-მინისტრის ბიძინა ივანიშვილის განცხადებით, მთავრობის ოპონენტები, რომლებიც ხელისუფლებაში ყოფნის დროს ქვეყნის მართვას სიცრუის და ძალადობის იდეილოგიით ახდენდნენ, საკუთარ სტილს არ ღალატობენ და დღესაც იგივეს აგრძელებენ.

ამის შესახებ პრემიერმა დღეს ჟურნალისტებთან გამართულ შეხვედრაზე განაცხადა.

„მინდა მათ შევახსენო, რომ სიცრუის და ძალადობის პოლიტიკას ქართველმა ხალხმა უარი უთხრა, როცა ყოფილ ხელისუფალთ ხმა არ მისცა. მიუხედავად ამისა, დღევანდელი უმცირესობა მსგავსი მეთოდებით მოქმედებას კვლავ აგრძელებს.

მაგალითად, ახალაიას დაპატიმრების შემდგომ ისინი აცხადებენ, რომ ახალაია არის პოლიტპატიმარი და ის ლამის ცოტნე დადიანადაც კი გამოჰყავდათ. სიცრუეა ასევე საზოგადოებრივი მაუწყებლის დირექტორის განცხადება, როდესაც 3 მილიონზე მეტი დავალიანების მქონე ორგანიზაციაში მაკონტროლებლების შესვლა, თავისუფალ მედიაზე ზეწოლად გამოაცხადა და პარალელი 2007 წლის 7 ნოემბრის მოვლენებთან გაავლო. პირველ რიგში ბატონ ჭანტურიას შევახსენებ, რომ ძალიან კარგად ვიცით როგორი საზოგადოებრივიც იყო ეს ტელევიზია და ვის ინტერესებს ემსახურებოდა, თუმცა აქ მთავარი სხვა რამეა, უმცირესობა ისევ და ისევ ძალადობის გზით, იმ რესურსის გამოყენებით რაც მათ ხელთ დარჩა, ძალადობენ ჩვენს ცნობიერებაზე და გონიერებაზე. მათ საქართველოს მოსახლეობა გონებაჩლუნგი ნუ ჰგონიათ“ - განაცხადა ივანიშვილმა.