საქართველოს პრემიერ-მინისტრის ბიძინა ივანიშვილის განცხადებით, მთავრობისთვის სოფლის მეურნეობის დარგის განვითარება ერთ-ერთი პრიორიტეტული საკითხია.

„გაზაფხულისთვის დაიწყება პროექტი, რომელიც გულისხმობს მიწების უპრეცედენტო რაოდენობის დამუშავებას, თუმცა პრობლემას ქმნის ის გარემოება, რომ მოსახლეობის 80 პროცენტს არ აქვს საკუთარი მიწები დარეგისტრირებული. ვფიქრობ, რომ ყოფილი ხელისუფლება ხელოვნურად აჭიანურებდა მიწების დარეგისტრირების პროცესს, რათა მოსახლეობა იოლად ემართა.

გაზაფხულისთვის ასევე იგეგმება ქარხნების მშენებლობა. აშენდება დაახლოებით 60 ქარხანა, რათა თითო რაიონში ერთი ქარხანა მაინც იყოს. რაც შეეხება იმ ერთმილიარდიან ფონდს რომელზეც ჩვენ მთავრობაში მოსვლამდეც ვსაუბრობდით, მზადდება პროექტი რომლის მიხედვითაც ამ თანხის გახარჯვა მოხდება. ვაპირებთ სპეციალური ტექნიკის შემოტანას რათა მოხდეს სარწყავი არხების აღდგენა. ასევე შემოვიტანთ მოტობლოკებსა და ახალ ტრაქტორებს“- განაცხადა პრემიერ-მინისტრმა.

ივანიშვილმა ასევე ისაუბრა რუსეთის ბაზრის შესახებაც და აღნიშნა, რომ ეს საქართველოსთვის საკმაოდ მნიშვნელოვანი საკითხია.

მისივე თქმით რუსეთის ბაზრის ქართული პროდუქციისთვის გახსნასთან დაკავშირებით აქტიური მუშაობა უკვე დაწყებულია.