საზოგადოებრივ მოძრაობა "ქართულ ოცნებაში" გადაწყვეტილებებს თინა ხიდაშელი იღებს და ბიძინა ივანიშვილის კარზე მიახლოების საშუალებას არავის აძლევს.

ამის შესახებ განცხადება საზოგადოებრივი მოძრაობა "ქართული ოცნების" ახალგაზრდული ორგანიზაციის ყოფილმა წევრმა ზაზა სვანაძემ დღეს, "პრაიმ-ტაიმის" პრესკლუბში განაცხადა.

მისივე თქმით, თინა ხიდაშელი, მაია ფანჯიკიძე და ლუბა ელიაშვილი არაადეკვატური პიროვნებები არიან.

"არ ვიცოდი მაია ფანჯიკიძე ასეთი სნობი და არაადეკვატური თუ იქნებოდა" - განაცხადა ზაზა სვანაძემ.

როგორც იგი აღნიშნავს, ეს პიროვნებები ხელისუფლებასთან ბრძოლის ნაცვლად, შიდა ქაოსით და პროვოკაციებით არიან დაკავებული.

როგორც ზაზა სვანაძემ აღნიშნა, მაია ფანჯიკიძე ახალგაზრდული მოძრაობის წევრებს "ფეისებად" და "ბიძინისტებად" ყოფს.

მან ასევე აღნიშნა, რომ მართალია "ქართულ ოცნებას" ფინანსური სახსრები აქვს, თუმცა, მისმა ხელმძღვანელებმა ოცი ათასები ჩაიჯიბეს და ახალგაზრდული ორგანიზაციის წევრებისთვის ნორმალური სამუშაო პირობების შექმნა არ უზრუნველყვეს.

როგორც სვანაძემ აღნიშნა, ლუბა ელიაშვილი, რომელიც ახალგაზრდული ორგანიზაციის საქმიანობას აკონტროლებს არ აქვს უფლება მას რაიმე ცენზი დაუწესოს.ამის უფლება მას არა აქვს, იქედან გამომდინარე, რომ ლუბა ელიაშვილის შვილი ე.წ სუბოტექსის "ბარიგებთან" მეგობრობს.

ზაზა სვანაძე საზოგადოებრივ მოძრაობა "ქართული ოცნების" ახალგაზრდულ ორგანიზაციში 3 თვის განმავლობაში მუშაობდა. როგორც მან თქვა, აღნიშნული ორგანიზაცია არსებული განუკითხაობისა და მძიმე პირობების გამო დატოვა.