საქართველოს პრეზიდენტმა მიხეილ სააკაშვილმა ბოლო პერიოდში ქვეყანაში დაწყებული მაღალჩინოსნების დაკავების საკითხზე კომენტარი გააკეთა და აღნიშნა, რომ ამ პროცესმა შეშფოთება გამოიწვია, როგორც საქართველოს მოსახლეობაში, ისე საქართველოს დასავლელ მეგობრებსა და მოკავშირეებში.

ამის შესახებ პრეზიდენტმა პროექტ „ახალგაზრდული პარლამენტის“ წევრებთან შეხვედრის დროს განაცხადა.

,,მინდა გაგიზიაროთ ჩემი წუხილი ქვეყანაში ბოლოდროინდელ მოვლენებთან დაკავშირებით. დაპატიმრებების ტალღა აგორდა, რომელმაც სამართლიანი შეშფოთება გამოიწვია ჩვენი მოსახლეობის დიდ ნაწილში და ჩვენი დასავლელი მეგობრებისა და მოკავშირეების რიგებში.ის რაც ხდება თავდაცვის სამინისტროში, რა თქმა უნდა აზარალებს ჩვენს ჯარს, არ შეიძლება ასეთი რიტორიკა ყოველდღიურად. იმიტომ, რომ როდესაც ასეთ პროპაგანდას აწარმოებ, ვეღარ იპოვი ჯარისკაცს, რომელიც მზად იქნება შენი ქვეყანა დაიცვას. ამასთან, პოლიციის შიგნით მასობრივი დაპატიმრება აზარალებს ჩვენს ამ სტრუქტურას, რომელზეც ქვეყნის უსაფრთხოება დგას’’ - განაცხადა სააკაშვილმა.

მან შეხვედრის დროს ახალ მთავრობას ქვეყნის ინტერესების ფარგლებში თნამშრომლობისკენ მოუწოდა.
,,ყველას და განსაკუთრებით ახალ უმრავლესობას მოვუწოდებ - ჩვენს საყვარელ ქვეყანას სჭირდება სოციალურ პრობლემებზე, მის ევროპულ მომავალზე და ამ საკითხების მუდმივად გაუმჯობესებაზე ყურადღების გამახვილება. ქართველ ხალხს არ სჭირდება წარსულის სიმწარე, შურისძიებები და სიძულვილი.
ბოლოდრონდელმა მშვიდობიანმა ძალაუფლების გადაცემის პროცესმა ნათლად აჩვენა, რომ ჩვენი ინსტიტუტები პოლიტიკურ პარტიებზე და სოციალური ჯგუფების ეკონომიკურ ინტერესებზე მაღლა დგას“ - დასძინა სააკაშვილმა.

მისივე თქმით ქვეყნის დემოკრატიული ინსტიტუტები არ უნდა იყოს გამოყენებული მოკლევადიანი პოლიტიკური სარგებლის მისაღებად და სახელმწიფოსა და ხალხისათვის გრძელვადიანი ზიანის მისაყენებლად.