თბილისის საკრებულოს ფრაქცია „ქრისტიან-დემოკრატების“ თავმჯდომარემ ზაზა გაბუნიამ ჟურნალისტებს დღეს სსიპ „გუდაურის განვითარების ფონდის“ მიერ შპს „ჯორჯიან განს“- თან გაფორმებული ხელშეკრულება გააცნო.

„ქრისტიან დემოკრატების“ ინფორმაციით, დადებული ხელშეკრულების მიხედვით ირკვევა, რომ ფონდმა კომპანიას ექვს მილიონზე მეტი ლარი, დაბა გუდაურში, ახალი სოფლის ტერიტორიაზე სასტუმროს მშენებლობისთვის გადაურიცხა. ხელშეკრულების მიხედვით, აღნიშნული მშენებლობა მიმდინარე წლის ივლისის ბოლოს უნდა დასრულებულიყო, თუმცა სასტუმრო ჯერაც არ არის დასრულებული.

„აგრეთვე ირკვევა, რომ აღნიშნული სასტუმროს მშენებლობისთვის, საქართველოს მთავრობის მიერ იქნა გამოცემული განკარგულება, რომელსაც ხელს მაშინდელი პრემიერ-მინისტრი ნიკა გილაური აწერს და რომლის მიხედვითაც ფონდს ტენდერის გარეშე, დაჩქარებული ტემპით, ექსკლუზიურად, შეზღუდულ ვადებში საქმიანობის განხორციელების უფლება მიეცა.

ჩვენ გვაქვს შეკითხვები გუდაურის განვითარების ფონდთან, როგორც შემსყიდველთან, იმასტან დაკავშირებით, თუ რატომ არ დასრულდა მოცემულ ვადებში აღნიშნული მშენებლობა. ასევე, რატომ შეირჩა მაინც და მაინც შპს „ჯორჯიან განსი“ ასეთი მსხვილბიუჯეტიანი პროექტის განსახორციელებლად“ - განაცხადა ზაზა გაბუნიამ.

გაბუნია ამ კითხვებზე პასუხის გასაცემად სსიპ „ გუდაურის განვითარების ფონდის“ ხელმძღვანელებს 23 ნოემბერს ოპოზიციური ფრაქციების „ქრისტიან დემოკრატების,“ „ქართული ოცნება-თბილისის“ და „თავისუფლების“ გაფართოებულ სხდომაზე იწვევს რათა დადგინდეს მოხდა თუ არა მხარეთა მიერ ვალდებულებების შესრულება ხელშეკრულების მე-12 მუხლის მიხედვით და მოხდა თუ არა ეს კანონით განსაზღვრულ ვადაში. პასუხის არ გაცემის შემთხვევაში, გაბუნია საქმის პროკურატურისთვის გადაცემას გეგმავს.