ირაკლი ოქრუაშვილი დღეს დილით საქართველოში დაბრუნდა.  „ქართული პარტიის“ პრესსამსახურის ინფორმაციით, ოქრუაშვილი საქართველოში დაბრუნდა „რათა მართლმსაჯულების წინაშე წარსდგეს“.

დღესვე, 1600 საათზე, თბილისის საქალაქო სასამართლოს სისხლის სამართლის კოლეგია (მოსამართლე ხათუნა ხარჩილავა) ირაკლი ოქრუაშვილის სისხლის სამართლის საქმეს განიხილავს (ბრალდება სისხლის სამართლის კოდექსის 223–ე მუხლის პირველი ნაწილი, უკანონო შეიარაღებული ფორმირების შექმნა ან ხელმძღვანელობა). სისხლის სამართლის საქმეზე ირაკლი ოქრუაშვილს, 2008 წლის 28 მარტის განაჩენით, მისჯილი აქვს თავისუფლების აღკვეთა 11- წლის ვადით.

ოქრუაშვილი აღნიშნულ სხდომაზე დასწრებას გეგმავს. „იგი აცნობიერებს, რომ, მიუხედავად დღევანდელი პროცესის შედეგისა, უნდა დარჩეს პატიმრობაში. ირაკლი ოქრუაშვილი მზადაა, საქართველოში დაბრუნებულმა, საპატიმროდან გააგრძელოს თავისი სიმართლისთვის ბრძოლა, გაასაჩივროს მის მიმართ დამდგარი უკანონო განაჩენი და სხვა ნებისმიერი ქმედება და დაამტკიცოს საკუთარი უდანაშაულობა, რის იმედსაც აძლევს ქვეყანაში მომხდარი ცვლილებები“ - ნათქვამია პარტიის პრესსამსახურის განცხადებაში.

ამ საკითხთან დაკავშირებით, დღეს 13 საათზე, ოქრუაშვილის ადვოკატების პრესკონფერენცია იგეგმება.