თვითმმართველობის განვითარებისა და რეგიონული პოლიტიკის საკითხებთან დაკავშირებული მრჩეველთა ჯგუფის ჩამოყალიბების თემაზე, რეგიონული განვითარებისა და ინფრასტრუქტურის სამინისტროში დღეს შეხვედრა გაიმართა.

შეხვედრაზე, სამინისტროს წარმომადგენლებთან ერთად მონაწილეობას საქართველოს პარლამენტის რეგიონული პოლიტიკისა და თვითმმართველობის და იურიდიულ კომიტეტების წევრები, ასევე, არასამთავრობო სექტორისა და საერთაშორისო ორგანიზაციების წარმომადგენლები და დამოუკიდებელი ექსპერტები იღებდნენ .

საქართველოს რეგიონული განვითარებისა და ინფრასტრუქტურის სამინისტროს ინფორმაციით, თვითმმართველობის განვითარებისა და რეგიონული პოლიტიკის საკითხებთან დაკავშირებული მრჩეველთა ჯგუფის მიზანია თვითმმართველობის რეფორმასთან დაკავშირებულ კონცეპტუალურ და საკანონმდებლო საქმიანობაში თანამონაწილეობა და თანამშრომლობა. ასევე დეცენტრალიზაციის პროცესის და რეგიონული პოლიტიკის პრიორიტეტების, ეტაპებისა და გეგმების განხილვა.
კანონპროექტების განხილვა და რეკომენდაციების მომზადება დეცენტრალიზაციის პროცესთან დაკავშირებულ ტექნიკურ, ინსტიტუციურ, სამართლებრივ და საფინანსო-ეკონომიკურ საკითხებზე.

თანამშრომლობის ფარგლებში სამინისტროსა და პარლამენტის შესაბამის კომიტეტებს შორის მემორანდუმის გაფორმება იგეგმება.