ვლადიმერ ხომერიკი კულტურისა და ძეგლთა დაცვის მინისტრს გურამ ოდიშარიას მოუწოდებს, რომ საბჭოთა ოკუპაციის მუზეუმის დახურვის საკითხი საზოგადოების სამსჯავროზე გამოიტანოს.

მისი განცხადებით, ის არ ეთანხმება გურამ ოდიშარიას პოზიციას მუზეუმის დახურვასთან ან სახელის გადარქმევასთან დაკავშირებით და ამ გადაწყვეტილებას „ნაჩქარევად მიღებულს“ უწოდებს.

„არ შემიძლია დავეთანხმო ნაჩქარევად მიღებულ თქვენს გადაწყვეტილებას. თუ თქვენს სამინისტროს არ შეუძლია დახუროს ან გადაარქვას სახელი სააკაშვილის მიერ გახსნილ პოლიტიკურად და ქართველი ხალხისთვის წამგებიან ოკუპაციის მუზეუმებს, მაშინ მიზანშეწონილი იქნება რომ გამოიტანოთ ეს საკითხი საქართველოს საზოგადოების სამსჯავროზე, ან თქვენი კოლეგიის და კულტურულ საბჭოზე განსახილველად“ - ნათქვამია ხომერიკის მიმართვაში.

მანვე, მიმართვაში ჩამოაყალიბა ის შვიდი ნაბიჯი, რომელიც საქართველომ რუსეთთან ურთიერთობის აღსადგენად და მეგობრული და მეზობლური კავშირების დასამყარებლად უნდა გადადგას.

ხომერიკის აზრით უნდა მოხდეს საქართველოსა და რუსეთს შორის დიპლომატიური კავშირების აღდგენა, ოკუპაციების მუზეუმების დახურვა და დასახელების შეცვლა, საქართველოსგან ჩერქეზების გენოციდის აღიარების ანულირება, პოლიტიკური და უკანონო ეკონომიკური ბრალდებით დასჯილი რუსეთის მოქალაქეების ციხეებიდან განთავისუფლება, ოკუპაციის კანონმდებლობის შესწორება, სარკინიგზო მიმოსვლის აღდგენა და სოჭის ოლიმპიადაში მონაწილეობის სურვილის გამოთქმა.