საქართველოს პრემიერ-მინისტრი ბიძინა ივანიშვილი საქართველოს იუსტიციის მინისტრისა და მთავარი პროკურორის მიერ რაიმე კანონსაწინააღმდეგო ქმედების ჩადენას გამორიცხავს.

„ჩვენ ვიცით, რომ მთავარი პროკურორი პატიოსანი და აკურატული ადამიანია. ჩვენ ასევე ძალიან კარგი იუსტიციის მინისტრი გვყავს. ორივე სამართლიანობის და პატიოსნების ნიმუშები არიან. მეც, ან თავად ღმერთსაც რომ მოეთხოვა კანონსაწინააღმდეგოდ მოქმედება, ისინი ამას არ ჩაიდენდნენ“ - განაცხადა ბიძინა ივანიშვილმა “DIE PRESS” -თან ინტერვიუში.

პრემიერი უარყოფს ინფორმაციას იმის შესახებ, რომ გაერთიანებული შტაბის ყოფილი უფროსის, გიორგი კალანდაძის დაკავება თავდაცვის მინისტრსა და პრეზიდენტს შორის ძალაუფლებისთვის ბრძოლის გამო მოხდა. „პრეზიდენტსა და თავდაცვის მინისტრს შორის არ არსებობს ძალაუფლებისათვის ბრძოლა. მაგრამ გენერალურ პროკურორზე, რომელმაც წამოაყენა ბრალდება, ჩვენ არანაირი გალენა არ გვაქვს. დარწმუნებული ვარ, რომ ის დამოუკიდებლად იმოქმედებს“ - აცხადებს პრემიერი.

მანვე კომენტარი გააკეთა ევროკომისიის პრეზიდენტთან შეხვედრაზე, სადაც საუბარი საქართველოში ბოლო დროს განხორციელებულ დაკავებებსაც შეეხებოდა. „ბაროზომ გამოთქვა ეჭვები, მაგრამ არც თუ ისეთი დიდი. არც ჩემთვისაა ახალაიას დაპატიმრება სასიამოვნო. მე ბატონ ბაროზოს ავუხსენი, რომ არანაირი შერჩევითი სამართალი არ გვაქვს“ - განაცხადა ივანიშვილმა “DIE PRESS” -თან ინტერვიუში.