თურქეთის რესპუბლიკაში ვიზიტად მყოფი, ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრი ალექსი პეტრიაშვილი, ენერგო და ეკონომიკურ სამიტზე სიტყვით გამოვიდა.

სახელმწიფო მინისტრი მოხსენებით პანელზე ,,ევროატლანტიზმის გაფართოება გამოვიდა.

საქართველოს ევროპულ და ევროატლანტიკურ სტრუქტურებში სახელმწიფო მინისტრის აპარატის ცნობით, ალექსი პეტრიაშვილმა თავის გამოსვლაში ყურადღება საქართველოში გამართული საპარლამენტო არჩევნების ჩატარებასა და არჩევნების გზით ხელისუფლების გადაცემის მნიშვნელობაზე გაამახვილა..
როგორც მან აღნიშნა საქართველომ წარმატებით ჩააბარა კიდევ ერთი მნიშვნელოვანი ტესტი ნატო-ში გაწევრიანების გზაზე.

„გამოვხატავთ რა მადლიერებას ჩრდილოატლანტიკური ალიანსისადმი მტკიცე მხარდაჭერისთვის, გამოვთქვამთ იმედს, რომ უახლოესი მაღალი დონის შეხვედრებზე ბრიუსელში აუცილებლად აისახება ის პროგრესი, რომელიც საქართველომ აჩვენა ხელისუფლების არჩევნების გზით გადაცემის თვალსაზრისით“-აღნიშნა მინისტრმა.

ალექსი პეტრიაშვილმა ხაზგასმით აღნიშნა, რომ ახალი ხელისუფლების პოლიტიკური ნება-საქართველო გახდეს ევროპისა და ნატო-ს სრულუფლებიანი წევრი - ურყევია, ხოლო გაწევრიანების პროცესი- შეუქცევადი“- ნათქვამია სამინისტროს პრესსამსახურის მიერ გავრცელებულ ინფორმაციაში.
პეტრიაშვილი ატლანტიკური საბჭოს მიწვევით ენერგო და ეკონომიკური სამიტის მუშაობაში მონაწილეობის მისაღებად თურქეთის რესპუბლიკაში, ქ.სტამბულში იმყოფება.
2012 წლის სამიტს პოლიტიკური, ენერგეტიკის, ბიზნესისა და ეკონომიკის საკითხების განსახილველად სხვადასხვა ქვეყნის პოლიტიკური ლიდერები, ასევე, დიპლომატიური კორპუსის წარმომადგენლები და სხვა მაღალი რანგის სტუმრები ესწრებიან.