პარტია „თავისუფალი საქართველო“ რუსეთთან ურთიერთობის აღდგენის მიმართულებით, ახალ მთავრობას რჩევებს სთავაზობს.

„პარტია „თავისუფალი საქართველო“ მიესალმება ახალი მთავრობის განცხადებას, რომ რუსეთთან ურთიერთობების მოწესრიგება წარმოადგენს პრიორიტეტულ მიმართულებას, მათ შორის რუსეთის ბაზარზე ქართული პროდუქციის დაბრუნება. ბოლო დღეებში გავრცელდა პრემიერ მინისტრ ივანიშვილის განცხადება, რომ იგი იმედგაცრუებულია რუსული მხარის პასიურობით ამ პროცესში.

ვინაიდან გაგვაჩნია გარკვეული გამოცდილება ამ სფეროში, გვსურს ვურჩიოთ ახალ მთავრობას თვითონ გადადგას პირველი ნაბიჯები და ნუ დაელოდება რუსულ მხარეს“ - ნათქვამია პარტიის მიერ გავრცელებულ განცხადებაში.

„თავისუფალი საქართველო“ მტავრობას ურჩევს დაუყოვნებლივ გაათავისუფლოს საქართველოს ციხეებში დაპატიმრებული რუსეთის მოქალქეები: სკრილნიკოვი, ბარბაქაძე და ბლიაძე. მით უფრო, რომ სამივე მათგანი „თბილისის ჰელსინკის ჯგუფის“ მიერ პოლიტ-პატიმრების ერთიან ნუსხაშია შეყვანილი. „ შეგახსენებთ, რომ რუსეთის საგარეო საქმეთა სამინისტრომ საქართველოს მთავრობას უკვე მიანიშნა ამ მოლოდინზე 1 ოქტომბრის არჩევნების შემდეგ და ეს იქნება კეთილი ნების პირველი გამოხატულება ქართული მხრიდან“ - მიიჩნევენ პარტიაში.

მათივე პოზიციით, უნდა გადაიხედოს კანონი ოკუპირებული ტერიტორიების შესახებ“ და ახალი მთავრობა არ უნდა წამოეგოს ნაციონალური მოძრაობის შანტაჟს ამ საკითხზე. უნდა გადაიხედოს ის წესები და სანქციები, რომლებიც აფერხებს აფხაზეთის და ცხინვალის რეგიონის ურთიერთობებს გარე სამყაროსთან, მათ შორის საქართველოს მოსაზღვრე რეგიონებთან და არა თავად ოკუპირებული ტერიტორიის სტატუსი. „თავისუფალი საქართველო“ ახალ ხელისუფლებას ურჩევს ასევე, რომ არ გამოიყენონ რუსეთის მიმართ ძველი ხელისუფლების რიტორიკას, ულტიმატუმებს და ა.შ.

„მაგალითად იმის შესახებ, რომ არ გადაიხედება საქართველოს კურსი ნატოში ინტეგრაციის შესახებ, რომ რუსეთმა ეს უნდა იცოდეს, რომ ჩვენ სოხუმთან და ცხინვალთან დავამყარებთ პირდაპირ ურთიერთობებს მოსკოვის ჩარევის გარეშე და სხვ. ასეთი ტიპის განცხადებებს უკვე მოყვა იმედგაცრუება არა მხოლოდ მოსკოვში, არამედ უარყოფითი გამოხმაურებები სოხუმიდან და ცხინვალიდან“ - აცხადებენ პარტიაში.