პარტია „დემოკრატიული მოძრაობა ერთიანი საქართველოს“ ლიდერმა ნინო ბურჯანაძემ, ეროვნულ-დემოკრატიული ინსტიტუტის (NDI) მიერ ორგანიზებულ კონფერენციაში - "გავიმარჯვოთ ქალებთან ერთად: გავაძლიეროთ პოლიტიკური პარტიები" მიიღო მონაწილეობა.

„დემოკრატიული პარტიის“ პრესსამსახურის ინფორმაციით, კონფერენციაზე, გარდა ნინო ბურჯანაძისა, მიწვეული იყო პარტიის მთავარი საბჭოს წევრი მანანა სალუქვაძე.

„ ნინო ბურჯანაძემ კონფერენციაზე გამოსვლისას კმაყოფილება გამოთქვა, იმასთან დაკავშირებით, რომ გენდერული თანასწორობის შესახებ კანონი საქართველოში, სწორედ მისი პარლამეტში მოღვაწეობის დროს იქნა მიღებული. მან ასევე განაცხადა, რომ პოლიტიკოსი ქალბატონების რიცხვი ყოველწლიურად იზრდება და აღნიშნა, რომ მათ შეუძლიათ პოზიტიური წვლილის შეტანა, რათა ქართული პოლიტიკა უფრო მიზანმიმართული, პრინციპული და ჰუმანური გახდეს“ - ნათქვამია პარტიის პრესსამსახურის მიერ გავრცელებულ ინფორმაციაში.

მათივე ცნობით, ნინო ბურჯანაძემ ისაუბრა აგრეთვე ანგარიშწორების იმ ფაქტებზე, რომელსაც წინა ხელისუფლება როგორც მამაკაცი, ასევე ქალი ოპონენტების მიმართ იჩენდა.

„მიუხედავად ქართველების ტრადიციული მოწიწებული დამოკიდებულებისა ქალბატონების მიმართ, „ნაციონალური ხელისუფლების“ პირობებში არანაირი ყურადღება არ ექცეოდა პოლიტიკური ოპონენტი ქალბატონებისადმი დამოკიდებულებას. ხელისუფლების მიერ ოპოზიციის წინააღმდეგ განხორციელებულ უკანონო ქმედებები არანაირად არ ანსხვავებდა ერთმანეთისაგან ქალ და მამაკაც პოლიტიკოსებს მაშინაც კი, როდესაც ეს ფიზიკურ ანგარიშსწორებამდე მიდიოდა და ასეთი შემთხვევები ძალიან ხშირი იყო“ - განაცხადა დემოკრატიული მოძრაობის ლიდერმა.

მანვე კონფერენციაზე 2010 წელს სოფელ ხურვალეთში მომხდარი ფაქტი გაიხსენა, როცა ადგილობრივ მოსახლეობასთან შესახვედრად ჩასულ „დემოკრატიული მოძრაობის“ ლიდერსა და მთავარი საბჭოს წევრებს, ხელისუფლებამ ზონდერბრიგადები დაახვედრა და ქვების სროლით დაუშინა, რის შედეგადაც პარტიის წევრებმა პიზიკური დაზიანებები მიიღეს.

„ე.წ. „ქვის მსროლელებიდან“ არავის მიუქცევია ყურადღება იმისათვის, რომ ჩვენს შორის ძალიან ბევრი მანდილოსანი იდგა, აღარაფერს ვამბობ ჩვენი პარტიისა და „სახალხო კრების“ წევრების წინააღმდეგ, წლების მანძილზე განხორციელებულ უპრეცედენტო ტერორსა და უამრავი ფიზიკური ანგარიშსწორების ფაქტზე, რომელზეც მიუხედავად ჩვენი არაერთი საჩივარისა, არც ერთი სისხლის სამართლის საქმე არ აღძრულა“-აღნიშნა ბურჯანაძემ და იმედი გამოთქვა, რომ ახალი ხელისუფლება გააგრძელებს ქვეყანაში სამართლიანობის აღდგენის პროცესს და ყველა ის პირი ვისაც კონკრეტული დანაშაული აქვს ჩადენილი, მართლმსაჯულების წინაშე წარსდგება.