ბრიუსელში დღეს საქართველოს პრეზიდენტსა და ევროსაბჭოს პრეზიდენტს შორის პირისპირ შეხვედრა გაიმართა.
პრეზიდენტის პრესსამსახურის ინფორმაციით, მიხეილ სააკაშვილმა და ჰერმან ვან რომპუიმ იმ პოლიტიკურ მოვლენებზე და პროგრესზე ისაუბრეს, რომელსაც საქართველომ ბოლო წლების განმავლობაში მიაღწია.
შეხვედრისას, ყურადღება ღრმა და ყოვლისმომცველი თავისუფალი ვაჭრობისა და უვიზო მიმოსვლის ხელშეკრულებების შესახებაც გამახვილდა. ჰერმან ვან რომპუის განცხადებით, მოლაპარაკების პროცესში ქვეყანამ დიდ შედეგს მიაღწია და იმედი გამოთქვა, რომ ამ კურსს ახალი მთავრობაც გააგრძელებს.
პირისპირ შეხვედრის შემდეგ, მიხეილ სააკაშვილმა და ჰერმან ვან რომპუიმ ერთობლივი განცხადებები გააკეთეს. ევროსაბჭოს პრეზიდენტმა საქართველოში გამართული საპარლამენტო არჩევნები დადებითად შეაფასა და განაცხადა, რომ დემოკრატიული პროცესები და რეფორმები საქართველოში კვლავაც უნდა გაგრძელდეს. მან იმედი გამოთქვა, რომ საქართველოს ახალი მთავრობა და ქვეყნის პირველი პირი ერთმანეთთან ითანამშრომლებენ. გამოსვლისას, იგი კიდევ ერთხელ შეეხო ევროკავშირთან ასოცირებული წევრობის, სავიზო რეჟიმის ლიბერალიზაციისა და ღრმა და ყოვლისმომცველი თავისუფალი ვაჭრობის ხელშეკრულებებზე მუშაობის პროცესში მიღწეულ შედეგებსა და იმ როლს, რომელსაც საქართველო ასრულებს აღმოსავლეთ პარტნიორობის ფარგლებში.

თავის მხრივ, მიხეილ სააკაშვილმა მადლობა გადაუხადა ევროსაბჭოს პრეზიდენტს არჩევნების პერიოდში მხარდაჭერისთვის. მან იმედი გამოთქვა, რომ თავისუფალი ვაჭრობის, უვიზო მიმოსვლის მიმართულებით ახალი მთავრობის პირობებშიც გაგრძელდება მუშაობა და აღნიშნა, საქართველო ახლა, როგორც არასდროს, ახლოსაა დასახულ მიზანთან. მისი თქმით, თუკი ქვეყნის ახალი მთავრობა კონფრონტაციის ნაცვლად, თანამშრომლობის გზას აირჩევს, ერთობლივი ინტენსიური მუშაობის შედეგად, საქართველო აუცილებლად გახდება ევროპის ნაწილი.