პოლიტიკური პარტია „საქართველოს გზის“ საერთაშორისო მდივანი თეიმურაზ მურვანიძე საქართველოში დაგეგმილი სამხედრო კომიტეტის ვიზიტის გაურკვეველი დროით გადადებას ეხმაურება.

როგორც მურვანიძის მიერ გავრცელებულ განცხადებაშია ნათქვამი, ვიზიტის გადადება "ნაციონალური მოძრაობის" მიერაა პროვოცირებული.

„ამ ვიზიტის გადადება მართლაც რომ უჩვეულო ფაქტია, მაგრამ გვინდა განვაცხადოთ, რომ ჯერ ერთი, ეს ფაქტი აბსოლუტურად არაა დაკავშირებული ნატოს მინისტერიალთან, რომელიც დეკემბრის თვეში უნდა გაიმართოს და მეორეც, ნატოს დეკემბრის თვეში დაგეგმილ მინისტერიალზე არ იგეგმებოდა რაიმე რადიკალური ცვლილება საქართველოსთან მიმართებაში. ჩვენი აზრით, აქ უბრალოდ ადგილი აქვს “ნაციონალური მოძრაობის" უკვე სტრატეგიად ქცეულ საბოტაჟის მიმართულებას და დარწმუნებული ვარ რომ ამ ვიზიტის გადადებაში პრეზიდენტმა, ბოკერიამ ან ელჩმა შეიტანა საკუთარი წვლილი, ან ყველამ ერთად. მით უმეტეს, როდესაც დაგეგმილია საქართველოს პრემიერ–მინისტრის ბ–ნ ბიძინა ივანიშვილის ვიზიტი ბრიუსელში. "ნაციონალური მოძრაობა" შემთხვევას არ უშვებს ხელიდან რომ რაიმე ზიანი მიაყენოს ქვეყანას და ახალ მთავრობას. ჩვენთვის მსგავსი ქმედება და მიდგომა მიუღებელია რადგან ვიწრო პარტიული ინტერესებისათვის და რევანშისტული განწყობების გამო არ შეიძლება ქვეყნის ინტერესების საზიანოდ მოქმედება“- აცხადებს „საქართველოს გზის“ საერთაშორისო მდივანი.