თბილისის მერს გიგი უგულავას მთავრობის სხდომაზე დასწრების საშუალება არ მისცეს.  ამის შესახებ ჟურნალისტებს მთავრობის კანცელარიაში თავად გიგი უგულავამ განუცხადა.

მერის თქმით, მთავრობა მის მიერ ინიცირებული საკითხის განხილვას არ აპირებს და ახალმა ხელისუფლებამ მას საშუალება არ მისცა მთავრობის სხდომას დასწრებოდა. უგულავას თქმით, თუ ხელისუფლება ასე გააგრძელებს, მალე ქაჯეთის ციხეს დაემსგავსება.

“თურმე მთავრობის სხდომაზე დასწრების უფლება არ მაქვს. ბოლო 10-15 წლის განმავლობაში მთავრობისგან მსგავსი რამ არ ყოფილა. ეს არის ცინიზმის მწვერვალი და კანცელარიის შენობა ნელ-ნელა გადაიქცევა ქაჯეთის ციხედ, სადაც ყველა ცდილობს იმას, რომ ერთ ადამიანს აამოს. ეს არის მათი მთავარი ამოცანა და მეტი არაფერი. ჩვენ ნელ-ნელა ვიღებთ კარჩაკეტილ მთავრობას რომელსაც არანაირად არ ანაღვლებს ხალხის ბედი და ეს ხდება არჩევნებიდან ორი კვირის შემდეგ“- განაცხადა უგულავამ.

პრემიერ-მინისტრის პრესსამსახურის ცნობით კი, ის საკითხი რომლის განხილვაში მონაწილეობის მიღებასაც უგულავა გეგმავდა, დღევანდელი დღის წესრიგით გაწერილი არ ყოფილა.

კანცელარიაში მთავრობის სხდომა 10.30 საათზე დაიწყო. დღის წესრიგში 12 საკითხია შეტანილი.