მიხეილ სააკაშვილმა ხელისუფლების ყოფილი მაღალჩინოსნების დკავებასან დაკავშირებით საგანგებო მიმართვა გააკეთა.

პრეზიდენტმა აღნიშნულ მოვლენებთან დაკავშირებით შეშფოთება გამოხატა და ყველას კანონის უზენაესობისა და სახელმწიფო ინტერესების პატივისცემისკენ მოუწოდა.

"ბოლო მოვლენები ჩემთვის არის შეშფოთების წყარო. დღეს, როგორც არასდროს, გვჭირდება კანონის უზენაესობა და ევროპული ორიენტაცია. საქართველოს განვითარება არ არის ზოგადი კატეგორია, ეს ეფუძნება კონკრეტულ კრიტერიუმებს, კრიტერიუმები კი პირველ რიგში მოქალაქეების უფლებების პატივისცემაში, ყველა დონეზე კანონის უზენაესობის დამკვიდრებასა და ინსტიტუტების პატივისცემაში მდგომარეობს"-განაცხადა პრეზიდენტმა.

პრეზიდენტმა მაღალჩინოსნების, მათ შორის აგვისტოს ომის ერთ- ერთი მონაწილის დაკავების მეთოდებს შეიარაღებული ძალების უპატივცემულობა უწოდა.

ქვეყნის პირველი პირის თქმით კანონის წინაშე ყველა თანასწორია, მაგრამ არსებობს ჩარჩოები, რომლის ფარგლებშიც კანონი უნდა იყოს დაცული.

ამასთან, პრეზიდენტის თქმით, დღევანდელი მოვლენები საქართველოს ნატოში ინტეგრაციასაც სერიოზულ პრობლემებს შეუქმნის.

"არჩევნების შემდეგ ჩვენ გვქონდა რეალური შანსი ნატოში ინტეგრაციის კუთხით წარმატებას მიგვეღწია. დღევანდელი მოვლენები ნამდვილად არ გვეხმარება ყველაფერ ამაში- სერიოზულ დაბრკოლებებს ქმნის და არ შეიძლება ეს მიხაროდეს. ჩვენ, როგორც არასდროს, უნდა დავდგეთ შურისძიებაზე, ბოღმაზე მაღლა და შევძლოთ ერთმანეთთან ადამიანური ლაპარაკი, დაე ნუ დავეთანხმებით ერთმანეთს", - აღნიშნა პრეზიდენტმა.