რუსეთსა და საქართველოს შორის დიპლომატიური ურთიერთობები არ აღდგება, ვიდრე რუსეთს საქართველოს ტერიტორიების 20% ოკუპირებული აქვს და სოხუმსა და ცხინვალში მისი საელჩოები ფუნქციონირებს.
ამის შესახებ დღეს ჟურნალისტებს ახლდდანიშნულმა საგარეო საგარეო საქმეთა მინისტრმა მაია ფანჯიკიძემ განუცხადა, რომელიც დღეს ოფიციალურად შეუდგა მინისტრის მოვალეობის შესრულებას.

ფანჯიკიძემ ხაზგასმით აღნიშნა, რომ რუსეთი საქართველოს ოკუპანტი სახელმწიფოა, თუმცა, მიუხედავად დიპლომატიური ურთიერთობების არ არსებობისა, დიალოგის წარმართვა შესაძლებელია.

მისი თქმით, არამხოლოდ საგარეო საქმეთა სამინისტროს, არამედ, მთელი ქვეყნის უპირველესი ამოცანა და მიზანი საქართველოს ტერიტორიების დეოკუპაციაა.

ამასთან, ფანჯიკიძემ საგარეო პოლიტიკურ პრიორიტეტებზე საუბრისას განაცხადა, რომ მან დღეს თანამშრომლებთან პირველ შეხვდრაზე პრიორიტეტების უცვლელობა დაადასტურა - ევროკავშირსა და ევროატლანტიკურ სტრუქტურებში ინტეგრაცია, სტრატეგიული პარტნიორობის გაღრმავება აშშ-სთან.

„პრიორიტეტებს შორისაა კეთილმეზობლური ურთიერთობები ჩვენს უშუალო მეზობლებთან და დიალოგის დაწყების მცდელობა რუსეთის ფედერაციასთან, იქნება ეს პირდაპირი გზით თუ საერთაშორისო თანამეგობრობის დახმარებით, ეს ის დეტალებია, რომლებიც ცოტა ხანში გაირკვევა“-განაცხადა ფანჯიკიძემ.

ამასთან, მინისტრმა სამწუხარო უწოდა იმ ფაქტს, რომ გუშინ პარლამენტში უმრავლესობასა და უმცირესობას შორის გამართულ პირველ დებატებზე „ნაციონალურმა მოძრაობამ“ კვლავ წამოწია ის თემა, რომელსაც ის მთელი წინასაარჩევნო კამპანიისას აქტიურად იყენებდა და რომელსაც ფანჯიკიძის თქმით, საქართველოს მოსახლეობამ არ დაუჯერა.

მისივე თქმით, „ნაციონალურ მოძრაობას“ არ აქვს არგუმენტები, იმის შესახებ,  თითქოს, ახალი ხელისუფლებისთვის ქვეყნის დეოკუპაციის საკითხი პრიორიტეტული არ იქნება და ის შესაძლოა, კითხვის ნიშნის ქვეშ დადგეს.