უმაღლესი საკანონმდებლო ორგანოს აპარატის უფროსი ზურაბ მარაქველიძე პარლამენტის სერვერების პარლამენტში დაბრუნებას მოითხოვს.

როგორც მარაქველიძემ ჟურნალისტებს განუცხადა, უმაღლესი საკანონმდებლო ორგანოს სერვერი იუსტიციის სამინისტროში დგას და ამ უწყებას ეძლევა იმის საშუალება, რომ ელექტრონულად პარლამენტში განთავსებული მასალა აკონტროლოს.

„ის, რომ საკანონმდებლო ხელისუფლების სერვერი აღმასრულებელ ხელისუფლებაშია განთავსებული, ეს უკვე მარაზმი და სრული აბსურდია. პარლამენტის კონტროლი რამდენად ხორციელდება ამას ვერ გეტყვით, მაგრამ ამ თემის შესწავლა მიმდინარეობს და მიმაჩნია, რომ პარლამენტს ეს სერვერები დაუბრუნდება. არცერთ სხვა შტოს არ აქვს უფლება აკონტროლოს რა ხდება პარლამენტში“ - განაცხადა აპარატის უფროსმა.

მარაქველიძის თქმით, უახლოეს მომავალში, იუსტიციის მინისტრთან თეა წულუკიანთან გაიმართება შეხვედრა და ეს საკითხი გადაწყდება ისე როგორც ცივილიზებულ სახელმწიფოს შეჰფერის.

ზემოაღნიშნულ საკითხზე გადაწყვეტილება წინა ხელისუფლების მმართველობის პერიოდშია მიღებული.