პარტია „თავისუფალი საქართველოს“ ლიდერი კახა კუკავა დასუფთავების გადასახადის სეზონურ გაიაფებას არ ეთანხმება.
როგორც მან დღეს თბილისის საკრებულოში გამართულ პრესკონფერენციაზე აღნიშნა, საკრებულოს კომიტეტების გაერთიანებულ სხდომაზე მიღებული გადაწყვეტილებით, დასუფთავების ტარიფი 1 კილოვატ საათ ელექტროენერგიაზე 5 თეთრის ნაცვლად 2.5 თეთრი იქნება. თუმცა, სისტემა იგივე რჩება და ის ისევ ელექტროენერგიაზეა მიბმული. ასევე, ძალაში რჩება, დასუფთავების გადასახადის გადაუხდელობის შემთხვევაში ელექტროენერგიის გათიშვის გადაწყვეტილება.

„თავისუფალი საქართველო“ აღნიშნული ინიციატივის წინააღმდეგია, რადგან საკრებულო სეზონურ ტარიფს იღებს, ხოლო სისტემა იგივე რჩება. თბილისელების პროტესტი, სწორედ დასუფთავებისა და ელექტროენერგიის გადასახადის გაერთიანებამ გამოიწვია და საზოგადოების მოლოდინი 1 ოქტომბრის შემდეგ, სწორედ ამგვარი საკითხების დარეგულირებაა.

მისი თქმით, ელექტროენერგიისა და დასუფთავების გადასახადების გამიჯვნის შესახებ საკონსტიტუციო სასამართლოში სარჩელი, თითქმის, ყველა ოპოზიციურმა პარტიამ შეიტანა, რადგან ის, რაც ანტიკონსტიტუციური იყო ხუთი თვის წინ, ანტიკონსტიტუციურია დღესაც.

კუკავას განცხადებით, დასუფთავების გადასახადის სისტემის შენარჩუნებისას კოალიცია „ქართული ოცნების“ წარმომადგენლებსა და საკრებულოს წევრებს შორის გარიგება შედგა. შესაბამისად, საზოგადოებას გადასახადის გადახდა ისევ ძველი მეთოდით მოუწევს.

„დაველოდებით, საკრებულოს დღევანდელ გადაწყვეტილებას და ცენტრალური მთავრობის რეაქციას, რის შემდეგაც, საკონსტიტუციო სასამართლოს საქმის განხილვის განახლებას მოვთხოვთ“ - აღნიშნა კახა კუკავამ.

მისი თქმით, დასუფთავების გადასახადი საზოგადოებრივ საჭიროებებს განეკუთვნება, ამიტომ, ის ცენტრალური ბიუჯეტიდან გამოყოფილი თანხით უნდა დაფინანსდეს.

ამასთან, კუკავა მიიჩნევს, რომ დასუფთავების გადასახადი ფიქსირებული უნდა იყოს, რომელიც კილოვატ საათით გაანგარიშებას არ ითვალისწინებს.

„თავისუფალი საქართველო“ ახალ ხელისუფლებას მიმართავს, აღნიშნულ საკითხში ჩაერიოს და საკანონმდებლო რეგულაციებით, ცენტრალური საბიუჯეტო სახსრების გამოყენებით, მოსახლეობისთვის მიუღებელი სისტემა შეცვალოს.

დასუფთავების გადასახადის ზამთრის პერიოდში შემცირების საკითხს საკრებულო დღეს განიხილავს. სხდომა 17:00 საათზე გაიმართება.