პარლამენტის უმრავლესობის ლიდერი დავით საგანელიძე დარწმუნებულია, რომ პრემიერ-მინისტრ ბიძინა ივანიშვილს ქვეყნის მართვა არ გაუჭირდება.

როგორც საგანელიძემ დღეს, უმაღლეს საკანონმდებლო ორგანოში განაცხადა, უმცირესობა ბევრს ლაპარაკობს იმაზე თუ რას გააკეთებს ივანიშვილი წელიწადნახევარში და რას დატოვებს თავის შემდეგ.

„ვერ წარმოგიდგენიათ, როგორ შეიძლება თქვენს მიერ დანგრეული და გაპარტახებული ქვეყანა წელიწადნახევარში ფეხზე დააყენო. ბიძინა ივანიშვილმა ზუსტად ერთი წლის წინ თქვა, რომ ამ სისტემას შეცვლიდა. მაშინ თქვენ გეგონათ, რომ სულ ცოტა, 16 წელი კიდევ ვერავინ შეგეხებოდათ ისე გქონდათ ფესვები გამდგარი და ისე გყავდათ დაჩაჩანაკებული და დაშინებული ხალხი, მაგრამ მან ერთ წელიწადში შეცვალა“ - განაცხადა საგანელიძემ.

მისი თქმით, მომავალ პრემიერს შესაძლოა, წელიწადნახევარიც არ დასჭირდეს იმისთვის, რომ თავის გუნდთან ერთად, ყოფილი ხელისუფლების წარმომადგენლებს დაანახოს, როგორი უნდა იყოს ქვეყანა.