საპარლამენტო უმცირესობის ერთ-ერთი ლიდერი გიორგი ბარამიძე უმრავლესობას დაპირებების შესრულების კონკრეტული ვადების დასახელებისკენ მოუწოდებს.
მან პარლამენტის სხდომაზე „ნაციონალური მოძრაობის“ წინასაარჩევნო კალენდარი წარადგინა და განაცხადა, რომ პარტიამ აღნიშნული ოთხწლიანი კალენდარი წინასაარჩევნოდ შექმნა, როცა მთავრობაში დარჩენას აპირებდა, თუმცა, ის სამთავრობო პროგრამა არ არის.

ბარამიძის თქმით, უმრავლესობას საკუთარი პროგრამა უკეთესად თუ არა, მსგავსი კალენდარის სახით მაინც გაეწერა.

„სამთავრობო პროგრამაში არ გთხოვთ, ბატონო ბიძინა, რომ ყველაფერი კონკრეტული ვადებით იყოს გაწერილი, მაგრამ გასაკვირი რატომ არის თქვენთვის, რომ თუნდაც ამდაგვარი უნდა გააკეთოთ. თუმცა, თქვენ ხომ უკეთესზე გაქვთ პრეტენზია და იმიტომ მოდიხართ ხელისუფლებაში, რომ ჩვენზე უკეთესი გააკეთოთ. ჩვენზე უკეთესს არ გთხოვთ, ჩვენნაირი მაინც გააკეთეთ და ხალხს უთხარით, როდის იქნება უფასო განათლება, უფასო ჯანდაცვა, გლეხი როდის შეძლებს, რომ უფასოდ დახნას და დათესოს, როდის იქნება შემცირებული ტარიფები დენზე, გაზზე, ფასები საწვავზე, როდის აუხდება ხალხს ის ოცნებები, რომელთან დაკავშირებით ხმა მოგცეს“ - განაცხადა ბარამიძემ.

მისივე თქმით, მნიშვნელოვანია, ახალმა უმრავლესობამ მოახერხოს ნათლად წარმოიდგინოს, რა ქვეყანა ჩაიბარა წინა ხელისუფლებამ და როგორია ის დღეს.

ბარამიძის განცხადებით, ის სასიკეთო ცვლილებები, რაც განხორციელდა, თავისთავად არ მომხდარა.

„სამწუხაროდ ითქვა, რომ ბევრი რამ, რაც გაკეთდა ბუნებრივიაო. ეს ბუნებრივი არ არის. თავისთავად გზები ვერ დაიგებოდა, თავისთვად კრიმინალური პოლიცია ხალხისთვს საპატივცემულო პოლიციად არ გადაკეთებულა. ჯარი, რომელიც ტანსაცმლის გარეშე იყო, არ ჩაცმულა და მსოფლოში ერთ-ერთ მოწინავე ჯარად თავისთავად არ ქცეულა. თავისთავად არ აშენებულა იუსტიციის სახლები“ - განაცხადა ბარამიძემ და აღნიშნა, რომ მიუხედავად ამისა, ქართულმა საზოგადოებამ ეს არასაკმარისად ჩათვალა და „ქართულ ოცნებას“ ხმა კონკრეტული დაპირებებისთვის მისცა.