საპარლამენტო უმცირესობის ლიდერი დავით ბაქრაძე ენერგეტიკის მინისტრის პოსტზე კახა კალაძის დანიშვნის პრინციპს მიზანშეწონილად არ მიიჩნევს.

როგორც მან პარლამენტის სხდომაზე განაცხადა, საკომიტეტო მოსმენებზე ხშირად ფიქსირდებოდა შეუსაბამობა ცალკეულ მინისტრებსა და სამთავრობო პროგრამას შორის.

ბაქრაძის თქმით, ერთ-ერთი ასეთი შეუსაბამობა კახა კალაძესა და მის თანამდებობას შორის არსებობს.

ამასთან, მან კალაძეს ბოდიში მოუხადა და განაცხადა, რომ როგორც ფეხბურთელს, მას დიდ პატივს სცემდა.

„ბოდიშს ვიხდი, არ მიყვარს არავის პერსონიფიცირება და ბოდიშს ვუხდი კახა კალაძეს. მე მას ნამდვილად პატივს ვცემდი როგორც ფეხბურთელს და წლების მანძილზე „მილანს“ ვგულშემატკივრობდი მხოლოდ იმიტომ, რომ იქ თამაშობდა, მაგრამ მე მასთან შეკითხვა მაქვს - ბატონო კახა, „მილანის“ მთავარ მწვრთნელს თქვენთის როდესმე უთქვამს, რომ ნიჭიერი ფეხბურთელი ხარ და მოდი ხვალ დაცვის მაგიერ კარებში ჩადექი, იყავი ნიჭიერი მეკარე და 1 თვეში ბურთის დაჭერას გასწავლითო?“ - განაცხადა ბაქრაძემ და დასძინა, რომ მისი ენერგეტიკის მინისტრის პოსტზე დანიშვნის პრონციპი არასწორია და პრობლემებს თავად მას შეუქმნის.

ბაქრაძის თქმით, მომავალში კახა კალაძეს დაეკისრება პასუხისმგებლობა იმაზე, რომ ქვეყანაში სიბნელე არ იყოს. ამასთან, მან იმედი გამოთქვა, რომ კალაძე დაკისრებულ მოვალეობას შეასრულებს, თუმცა, მისივე თქმით, „ნაციონალური მოძრაობა“ კალაძის ენერგეტიკის მინიტრად დანიშვნის პასუხისმგებლობას ვერ გაიზიარებს.

„ვფიქრობ, რომ თქვენთის იმ სფეროს ჩაბარება, რომელიც არ იცით, პირველ რიგში თქვენთვის არის პრობლემური, იმიტომ რომ თქვენ უნდა აიღოთ პასუხისმგებლობა იმაზე, რომ საქართველოში სიბნელე არ იყოს. ნამდვილად იმედი მაქვს, რომ შეისწავლით და საქართველოში სიბნელე აღარ დაბრუნდება. ასევე, იმედი მაქვს, რომ იქნებით წარმატებული, მაგრამ ამ ეტაპზე ჩვენ ამ პასუხისმგებლობას ვერ გავიზიარებთ“ - განაცხადა მან.