ფრაქცია „ქართული ოცნების“ თავმჯდომარემ ზაქარია ქუცნაშვილმა პარლამენტში სიტყვით გამოსვლისას „ნაციონალური მოძრაობის“ წევრს, ზუგდიდის მაჟორიტარ დეპუტატს როლანდ ახალაიას მიმართა, რომ სამეგრელოს მოსახლეობას მისი ქმედებები კარგად ახსოვს.

„სამწუხარო ისაა, რომ დღეს ჩვენ ერთ რეალობაში ვსხედვართ, სადაც თქვენც და სხვა ადამიანებსაც პარლამენტის წევრი ჰქვია“ - აღნიშნა ქუცნაშვილმა.

მისივე თქმით, ახალაიას ცრუ ბრალდების გამო, ბევრი ადამიანი დღემდე ციხეში იტანჯება.

„თქვენ გააუბედურეთ ათასობით ოჯახი, მაგრამ დღეს დაგვცინით იმის გამო, რომ პარლამენტის წევრი გქვიათ“-აღნიშნა მან.

ქუცნაშვილი აცხადებს, რომ საქართველოში დემოკრატიული ტრანსფორმაცია კი არ მოხდა, არამედ, „ქართულმა ოცნებამ“ „ნაციონალურ მოძრაობას“ ძალაუფლება ხელიდან გამოგლიჯა.

მისი თქმით, „ნაციონალური მოძრაობის“ მმართველობის პერიოდში პოლიციის შენობებიდან „ხალხი ცვიოდა“. ქუცნაშვილმა უმრავლესობის წევრი რამდენიმე დეპუტატიც დაასახლა, რომელზეც ყოფილმა მმართველმა ძალამ ფიზიკური ზეწოლა განახორციელა.

ქუცნაშვილი იმის განმარტებას შეეცადა თუ სად გადის ზღვარი შურისძიებასა და სამართლის ძიებას შორის.

„შურისძიება ნიშნავს, რასაც თქვენ აკეთებდით - დაგახვედრონ გადაცმული ადამიანები და გაგიხეთქონ თავი. სამართლის ძიებაა, რომ სასამართლოში წავიდეს როლანდ ახალაიას საქმე და სამართლიანმა სასამართლომ დაადგინოს, გასცემდა თუ არა ის უკანონო ბრძანებებს“-აღნიშნა ქუცნაშვილმა.

მისივე თქმით, ქართულ საზოგადოებაში სიტყვა „უმრავლესობა“ დისკრედიტებულია და „ქართული ოცნება“ შეეცდება ამ მდგომარეობის შეცვლას.

ქუცნაშვილი აცხადებს, რომ დემოკრატიის კანონები მკაცრია და ხელისუფლება უნდა შეეგუოს, პარლამენტის დარბაზის ერთ კუთხეში ზის ადამიანების ჯგუფი, რომელიც ძალადობის და უსამართლობის იდეოლოგი იყო, სიამოვნებით აწერდა ხელს უკანონო ბრძანებებს და რომელმაც,  მისი შეფასებით, ქართული მართლმსაჯულება დაასამარა.