მერვე მოწვევის პარლამენტის დეპუტატების ხელფასების ზრდა მოსალოდნელი არ არის.

ამის შესახებ „ნიუსპრესს“ საპარლამენტო უმცირესობის წარმომადგენელმა პარლამენტის ხაზინადართა საბჭოს წევრმა მიხეილ მაჭავარიანმა განუცხადა.

რაც შეეხება პარლამენტის აპარატის წევრებისა და დეპუტატების ბინების ქირის ბიუჯეტიდან დაფარვის საკითხს, მაჭავარიანი აცხადებს, რომ როდესაც, პარლამენტის ქუთაისში გადატანის საკითხი განიხილებოდა, ბიუჯეტში შეიქმნა თანხის რეზერვი აპარატის თანამშრომლებისთვის, რათა მათ ბინის ქირის გადასახდელად დანამატი ჰქონოდათ.

„გუშინ, ამ საკითხზე, ხაზინადართა საბჭომ იმსჯელა და გადაწყვეტილება მიიღო, რომ აპარატის წარმომადგენლები რანგის მიხედვით, დანამატს საშუალოდ 300-400 ლარის ფარგლებში მიიღებენ“ - განაცხადა მაჭავარიანმა.

დეპუტატის ინფორმაციით, კანონმდებლების ხელფასების ზრდაზე არ არის საუბარი, თუმცა, როგორც აქამდე თბილისში ხდებოდა, ასევე ქუთაისშიც დეპუტატს ბინის ქირის საფასურს ბიუჯეტი დაუფარავს, რისი ოდენობაც  500 ლარამდე განისაზღვრება.

მაჭავარიანის განცხადებით, ამ დრომდე, უცნობია ახალი პარლამენტის მომსახურების ხარჯები რამდენი იქნება, რა თანხა დაუჯდება ბიუჯეტს საკანონმდებლო ორგანოს კონდეციონირებით, ელექტროენერგიითა და გათბობით მომსახურება.