პარლამენტის დროებითი საგამოძიებო კომისიის თავმჯდომარეობის კანდიდატმა თინა ხიდაშელმა საკანონმდებლო ორგანოში თავისი გამოსვლა უმცირესობის წევრის პეტრე ცისკარიშვილისადმი მადლობის თქმით დაიწყო.

როგორც ხიდაშელმა აღნიშნა, ერთადერთი, რაც „ერთიანი ნაციონალური მოძრაობის“ ახმეტის მაჟორიტარი დეპუტატობის ყოფილმა კანდიდატმა საარჩევნო ძალადობას დააკლო, 1 ოქტომბრის ღამეს „ტყვიის სროლა იყო“, რაც არ გააკეთა და ამისთვის მადლობა მას. 

„სხვა ყველაფერი გააკეთეთ, რისი წარმოდგენაც ადამიანს შეუძლია“ - მიმართა მან ცისკარიშვილს.

ხიდაშელმა კომენტარი „ნაციონალური მოძრაობის“ ბრალდებაზეც გააკეთა იმასთან დაკავშირებით, რომ „ქართული ოცნების“ წევრები ოპონენტებზე ზეწოლას ახორციელებენ და ემუქრებიან.

უმრავლესობის წარმომადგენლის განმარტებით, 1 ოქტომბრის შემდეგ, საქართველოში არა მხოლოდ ხელისუფლება, არამედ, ადამიანებისადმი დამოკიდებულებაც შეიცვალა და დავიწყებას მიეცა ისეთი ლექსიკა, როგორიცაა ძალადობა, დაშინება და შანტაჟი.

მისი თქმით, ქვეყანას საპროტესტო ტალღამ გადაუარა, „ნაციონალურ მოძრაობას“ ტოვებენ მისი მხარდამჭერები და ეს პროცესი პარლამენტშიც გაგრძელდება, რადგან, მისივე თქმით, ქვეყანაში „თავისუფლების სიომ დაჰბერა“ და ადამიანები თავისუფლდებიან იმ ბორკილებისგან, რომელიც ყოფილმა მმართველმა გუნდმა ხალხს დაადო.

„რასაც ახლა მე ვიტყვი, ვიღაცამ შეიძლება ზეწოლად ჩათვალოს. ამ დარბაზში ზის ბატონი როლანდ ახალაია. მაქვს მაღალი ლეგიტიმური ეჭვი, რომ ბაჩო და დათა ახალაიებს ალბათ მოუწევთ სამართლიანი მართლმსაჯულების წინაშე წარდგომა. ჩვენ ამას ვეძახით კანონის წინაშე თანასწორობას და ჩადენილი დანაშაულებისთვის სასჯელის გარდაუვალობას“ - განაცხადა ხიდაშელმა და დასძინა, რომ საზოგადოებას ღრმად სწამს, რომ ამ ადამიანებს დანაშაული აქვთ ჩადენილი.

ხიდაშელს, გამოსვლის დასრულების შემდეგ, ზუგდიდის მაჟორიტარმა დეპუტატმა როლანდ ახალაიამ ტაში დაუკრა.