საპრლამენტო უმრავლესობა აუცილებლად მოსთხოვს მთავრობას ყველა დანაპირების შესრულებას, სამართლიანობის აღდგენა კი, წარსულიდან დაიწყება - ამის შესახებ საპარლამენტო უმრავლესობის წარმომადგენელმა გიორგი ჟვანიამ განაცხადა.

მისი თქმით, მას მოლოდინი ჰქონდა, რომ საპარლამენტო უმცირესობის რომელიმე წევრი მაინც მოიხდიდა ბოდიშს თავის გამოსვლაში იმისთვის, რაც მისი ხელისუფლებაში ყოფნის პერიოდში, საქართველოში ბოლო 9 წლის განმავლობაში ხდებოდა.

„მე მქონდა ამის მოლოდინი, თუმცა, სამწუხაროდ, არც ერთ მათგანს არ აღმოაჩნდა იმის არც ვაჟკაცობა და არც ზნეობა, რომ გამოვიდეს და საზოგადოებას უთხრას სიმართლე და უთხრას, რომ აცნობიერებს იმ დანაშაულს, რაც მათ ხალხის წინაშე ჩაიდინეს“ - განაცხადა ჟვანიამ.

მისი თქმით, საზოგადოების უდიდესი ნაწილი გაუსაძლის მდგომარეობაშია და ადამიანების უმეტესობას ელემენტარული საარსებო საშუალება არ გააჩნია, ათასობით მოქალაქე კი, უსამართლოდ იმყოფება საპატიმროში.

„ვინ არის ამაზე პასუხისმგებელი, ვის მიმართავთ თქვენ პრეტენზიებით, სწორედ თქვენ ხართ ის ადამიანები, რომლებსაც ხელგეწიფებოდათ, რომ ეს არ მომხდარიყო ქვეყანაში“ - მიმართა ჟვანიამ უმცირესობის წარმომადგენლებს.

მისი თქმით, ქვეყანაში სამართლიანობა აუცილებლად აღდგება და ეს წასრულიდან დაიწყება.

„ყველა იმ ადამიანს, რომელმაც დანაშაული ჩაიდინა, პასუხი მოეთხოვება. ჩვენ აუცილებლად ვიცხოვრებთ სამართლიან და თავისუფალ ქვეყანაში“ - განაცხადა ექს პრემიერ-მინისტრის, აწგარდაცვლილი ზურაბ ჟვანიას ძმამ, გიორგი ჟვანიამ სხდომაზე.