საქართველოს პრემიერ-მინისტრობის კანდიდატის ბიძინა ივანიშვილის განცხადებით, ეროვნული ბანკი პოლიტიკური წნეხისგან გათავისუფლდება.

როგორც მან პარლამენტის სხდომაზე სიტყვით გამოსვლისას აღნიშნა, ფულად-საკრედიტო და სავალუტო პოლიტიკის ძირითადი პრიორიტეტები განისაზღვრება.

„ეროვნული ვალუტის მიმართ ნდობის გაზრდისა და კომერციულ ბანკებს შორის ჯანსაღი კონკურენციის არსებობის ხელშეწყობა მოხდება, ეროვნული ბანკი პოლიტიკური წნეხისგან გათავისუფლდება“ - აღნიშნა ივანიშვილმა.

მისი თქმით, საქართველოს მთავრობა ბიუჯეტის ხარჯვითი ნაწილის ეფექტიანობას გაზრდის და არამიზნობრივ ხარჯებს გააუქმებს.

ივანიშვილის განცხადებით, ადმინისტრაციული ხარჯებისა და ჩრდილოვანი ეკონომიკის მასშტაბების შემცირების გზით, ბიუჯეტში მნიშვნელოვან თანხებს მოიძიებს, რომლითაც პრიორიტეტული მიმართულებები - ჯანდაცვა, სოციალური უზრუნველყოფა, განათლება და სოფლის მეურნეობა დაფინანსდება.

„სახელმწიფო აუდიტის სამსახური საბიუჯეტო პროცესში რეალურად მიიღებს მონაწილეობას. მისი ძირითადი საქმიანობა ფინანსური შესაბამისობისა და ეფექტიანობის კონტროლი იქნება. გამჭვირვალე გახდება ბიზნესსექტორსა და სახელმწიფოს შორის ურთიერთობა, რაც საბიუჯეტო შემოსავლებზე დადებითად აისახება“ - აღნიშნა ივანიშვილმა.

მისი თქმით, საკვები პროდუქტები სიცოცხლისა და ჯანმრთელობისთვის საშიში აღარ იქნება. ასევე, მნიშვნელოვნად შემცირდება მომხმარებელთა უფლებების დარღვევის ფაქტები.

როგორც პრემიერ-მინისტრობის კანდიდატმა აღნიშნა, მთავრობის საგადასახადო პოლიტიკა სამართლიანობის პრინციპზე დაფუძნებული დაბეგვრის მექანიზმებს უზრუნველყოფს.

მისი თქმით, ყოველწლიურად საშემოსავლო გადასახადის დაუბეგრავი მინიმუმი დადგინდება, რომელიც საარსებო მინიმუმზე ნაკლები არ იქნება.