საქართველოს პრემიერ-მინისტრობის კანდიდატის ბიძინა ივანიშვილის განცხადებით, ეკონომიკის კონკურენტუნარიანობის უზრუნველყოფის მიზნით ეკონომიკური უწყებების სტრუქტურული მოდერნიზება მოხდება.

როგორც მან პარლამენტის სხდომაზე სიტყვით გამოსვლისას აღნიშნა, მოხდება ექსპორტის სტიმულირება და იმპორტის ჩანაცვლება.

მისი თქმით, სახელმწიფო სამართლიანი, თავისუფალი და კონკურენტული საბაზრო გარემოს შექმნას უზრუნველყოფს და თანამედროვე ინფრასტრუქტურის ჩამოყალიბებას შეუწყობს ხელს.

„ჩვენი ეკონომიკური პოლიტიკის შედეგად სასოფლო-სამეურნეო წარმოება გაიზრდება. ეს ჩვენი ქვეყნის მოსახლეობის მნიშვნელოვან ნაწილს სტაბილურ შემოსავალს მოუტანს, გაზრდის საქართველოს სასურსათო უსაფრთხოებასა და ქვეყნის საექსპორტო პოტენციალს“ - განაცხადა ივანიშვილმა.

მისი თქმით, მცირე და საშუალო ბიზნესის განვითარება ქვეყანას ეკონომიკური კრიზისიდან გამოიყვანს, უმუშევრობას შეამცირებს და სიღარიბის დაძლევას შეუწყობს ხელს.

ივანიშვილის განცხადებით, მოსახლეობის მიერ გადახდილი გადასახადები მიზნობრივად და გამჭვირვალედ დაიხარჯება.

„საქართველოს მთავრობის უმთავრესი ამოცანაა ისეთი საბაზრო სისტემის ჩამოყალიბება, სადაც მონოპოლიების არსებობა გამორიცხული იქნება. საგარეო-სავაჭრო პოლიტიკის კუთხით, საქართველოს მთავრობისთვის პრიორიტეტული საექსპორტო საბაზრო არეალების მნიშვნელოვანი გაფართოება, ევროკავშირსა და აშშ-სთან თავისუფალი ვაჭრობის რეჟიმების ამოქმედება, რუსეთის ფედერაციასთან სავაჭრო ურთიერთობების აღდგენაა“ - განაცხადა ივანიშვილმა.

მისივე თქმით, მთავრობის მიერ შემუშავებული დასაქმების პოლიტიკის შედეგად საკუთარი კვალიფიკაციისა და გამოცდილების შესაბამისი სამუშაო ადგილის მოძიება, ცოდნისა და უნარის გამოყენება გახდება შესაძლებელი.

ივანიშვილის განცხადებით, ეს საზღვარგარეთ მოსახლეობის მასობრივ გასვლას, ასევე, სოციალური გაჭირვების ნიადაგზე ჩადენილ დანაშაულობათა რიცხვს შეამცირებს და დემოგრაფიულ მაჩვენებელს გააუმჯობესებს.