ახალ მინისტრთა კაბინეტს დღეს პარლამენტის სხდომაზე დაამტკიცებენ. მინისტრობის კანდიდატურები კოალიცია „ქართული ოცნების“ ლიდერმა, პრემიერ-მინისტრობის კანდიდატმა ბიძინა ივანიშვილმა რამდენიმე დღის წინ სრულად დაასახელა.

ივანიშვილმა შს მინისტრად ირაკლი ღარიბაშვილი წარადგინა, თავდაცვის მინისტრად - ირაკლი ალასანია, ამავე დროს, ის იქნება ვიცე-პრემიერი, იუსტიციის მინისტრად - თეა წულუკიანი, სასჯელაღსრულების მინისტრად - სოზარ სუბარი, საგარეო საქმეთა მინისტრად - მაია ფანჯიკიძე, ენერგეტიკის მინისტრად - კახა კალაძე, რომელიც მეორე ვიცე-პრემიერი იქნება, სოფლის მეურნეობის მინისტრის პოსტზე დავით კირვალიძეა დასახელებული, სპორტისა და ახალგაზრდობის საქმეთა მინისტრად - ლევან ყიფიანი, კულტურისა და ძეგლთა დაცვის მინისტრად - გურამ ოდიშარია, შრომის, ჯანმრთელობისა და სოციალური დაცვის მინისტრად - დავით სერგიენკო, დიასპორის საკითხებში სახელმწიფო მინისტრად კოტე სურგულაძე, ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის პოსტზე - ალექსი პეტრიაშვილი, რეინტეგრაციის საკითხებში სახელმწიფო მინისტრის თანამდებობაზე - პაატა ზაქარეიშვილი.

ფინანსთა მინისტრად დასახელებულია ნოდარ ხადური, ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრად - დავით დარახველიძე, ეკონომიკის მინისტრად - გიორგი კვირიკაშვილი. გარემოს დაცვის სამინისტროს უხელმძღვანელებს ხათუნა გოგოლაძე, განათლებისა და მეცნიერების სამინისტროს - გიორგი მარგველაშვილი, ხოლო რეგიონალური განვითარებისა და ინფრასტრუქტურის სამინისტროს - დავით ნარმანია.
მთავრობის დამტკიცებას პარლამენტის დეპუტატების უმრავლესობის მხარდაჭერა სჭირდება. მინისტრობის კანდიდატებს უკვე მოუსმინეს საპარლამენტო კომიტეტებში.

პარლამენტის სხდომა ქუთაისში 12:00 საათზე გაიმართება.