პრემიერ-მინისტრობის კანდიდატი ბიძინა ივანიშვილი აცხადებს, რომ მედია მეოთხე ხელისუფლებაა და ის რეალურად დამოუკიდებელი უნდა იყოს. 
როგორც ივანიშვილმა დღეს საპარლამენტო უმრავლესობასთან შეხვედრისას განაცხადა, მედია ხელისუფლებისგან შორს უნდა იყოს.

„კრიტიკა და ოპონირება ყოველთვის ჩემი ცხოვრების წესი იყო. მგონი, აბსოლუტური უმრავლესობა იზიარებთ ჩემს დამოკიდებულებას, რომ აუცილებლად გვჭირდება ოპონირება და ჯანსაღი კრიტიკა. ამას ყველაზე კარგად მედია აკეთებს“-განაცხადა მან და დეპუტატებს და მთავრობის წევრებს მედიასთან მაქსიმალურად ინტენსიური და გამჭვირვალე ურთიერთობისკენ მოუწოდა.

ამასთან, ივანიშვილი არ დაეთანხმა დეპუტატ კობა დავითაშვილის პოზიციას იმასთან დაკავშირებით, რომ უმრავლესობასა და მთავრობის წევრებს შორის პოლიტიკური პოზიციების შეჯერება სხვა ფორმატში, დახურულ კარს მიღმა უნდა ხდებოდეს. თუმცა, პრემიერ-მინისტრობის კანდიდატი მიიჩნევს, რომ კამერების წინ მუშაობა მაინდამაინც ეფექტური არ არის.

„თუ გუნდი გაიხლიჩება და ბევრ საკითხზე პრინციპულად განსხვავებული პოზიცია ექნება, ასეთ შემთხვევაში, განუხრელად დავაფუძნებთ საჯაროობას. თუ ვინმეს გაუჩნდება გრძნობა, რომ გუნდში ვიღაც პიროვნება ან ჯგუფი სარგებლობს პრიორიტეტით, აზრის გამოთქმას ვერ ახერხებს დახურულ მდგომარეობაში, ასეთ შემთხვევაში გახდება საჯაროობის საჭიროება. წინააღმდეგ შემთხვევაში, დრო აღარ დაგვეკარგება კეკლუცობაზე, რომ ჟურნალისტები გვიყურებენ. ალბათ, უფრო ნაყოფიერი იქნება მუშაობა კამერების გარეშე“-განმარტა ივანიშვილმა.