საპარლამენტო უმცირესობის წევრი ნუგზარ წიკლაური მიიჩნევს, რომ პრემიერ-მინისტრობის კანდიდატი ბიძინა ივანიშვილი ცვალებადი ფსიქიკის ადამიანია, რომელსაც არ შეიძლება ქვეყანა ანდო.

ამის შესახებ წიკლაურმა დღეს უმცირესობის სხდომაზე, ივანიშვილის მიერ მთავრობის სამოქმედო გეგმის პრიორიტეტებზე საუბრისას განაცხადა.

„დღეში რამდენჯერ იცვლით პოზიციას? ჯერ ამბობდით, რომ პირველი ვიზიტით აშშ-ში გაემგზავრებოდით და მერე აღმოჩნდა, რომ ევროპაში; გადასახადები ელვისებურად დაიწევდა და საპროცენტო განაკვეთი 1-3% -ის ფარგლებში იქნებოდა, ხოლო ახლა თურმე ასე არ ყოფილა; ვერც ერთ დაპირების შესრულების თარიღს ვერ ასახელებთ“ - განაცხადა წიკლაურმა.

მისი თქმით, საქართველო ივანიშვილის გასართობი არ არის და მას არ მიეცემა იმის საშუალება, რომ ქვეყანა რუსეთისკენ წაიყვანოს, საიდანაც თავად 9 წლის წინ ჩამოვიდა.

„საქართველო რუსეთი არ გახდება. გქონდეთ იმედი, რომ ქართული ელიტა არნახულ შეკავშირებას მოახერხებს იმისთვის, რომ თქვენი ამ ტიპის გეგმები არ განგახორციელებინოთ“ - განაცხადა წიკლაურმა.

საპასუხოდ ბიძინა ივანიშვილმა წიკლაურის განცხადებას დემაგოგია უწოდა და აღნიშნა, რომ თუ ასეთი მიდგომა არ შეიცვლება, უმცირესობის დემაგოგიას გასავალი აღარ ექნება.

ამასთანავე, პრემიერ-მინისტრობის კანდიდატი აცხადებს, რომ ის ყოველთვის იქნება რეალისტი და არ გაიმეორებს ფასადურ დაპირებებს.

„იმ ფასადურმა რეფორმებმა, რითაც ეს ხელისუფლება ტრაბახობს, ძალიან ხშირად შეცდომაში შეიყვანა მსოფლიო ინსტიტუტები და რაღაც რეიტინგებიც მიიღეს. ჩვენ მოვახერხებთ, რომ საზოგადოება სიცრუიდან ამოვიდეს, და ყოველთვის რეალისტები ვიქნებით“ - განაცხადა ივანიშვილმა.