პარლამენტის ვიცე-სპიკერის გია ბარამიძის განცხადებით, საპარლამენტო უმცირესობა საზოგადოების სახელით ვალდებულია გაარკვიოს როდის შესრულდება ახალი ხელისუფლების დაპირებები.

მისი თქმით, ქართველ ხალხს იმ დაპირებების რეალიზაციის ვადები აინტერსებს, რომელიც ივანიშვილმა გასცა.

„ქართველი ხალხის უმრავლესობისთვის თქვენ არა უბრალოდ მდიდარ და წარმარტებულ ადამიანს განასახიერებთ, არამედ ადამიანს, რომელიც ქვეყნის სათავეში მოვიდა და თითოეულ ჩვენს თანამოქალაქეს ოცნებას ერთგვარად მართლაც აუხდენს“ - განაცხადა ბარამიძემ.

მისი თქმით, რა თქმა უნდა, საქართველოში ადამიანის უფლებების კუთხით იდეალური სიტუაცია არ არის, თუმცა, იდეალური მდგომარეობა არც ახალი ხელისუფლების წასვლის შემდეგ იქნება.

„ალბათ დამეთანხმებით, თქვენ რომ ხელისუფლებიდან წახვალთ არც მაშინ იქნება იდეალური სიტუაცია, რადგან იდეალური სიტუაცია ადამიანის უფლებების დაცვის კუთხით არსად არ არის. რა თქმა უნდა, საამაყო არ არის, რომ შს მინისტრი პირადად არ კლავს ადამიანებს, მაგრამ საქართველომ ეს პერიოდი გაიარა“ - განაცხადა გია ბარამიძემ.

მისი თქმით, არ შეიძლება დაუნახაობა იმისა, რომ აღარ არსებობს ის ჯარი და პოლიცია, რომელიც იყო. ახლა აღნიშნული ინსტიტუტები ბევრად უკეთესია.

„არ ვამბობთ, რომ ქვეყანაში ყველა ბედნიერია. ყველა ბედნიერი რომ იყოს მაშინ ჩვენ მოგვცემდნენ ხმას და არა თქვენ“ - განაცხადა ბარამიძემ და დასძინა, რომ ისინი ხელისუფლებაში ყოფნის დროსაც ყოველთვის ეთანხმებოდნენ აზრს, რომ ბევრი რამ არასწორად და არასაკმარისად გაკეთდა.