პრემიერ-მინისტრობის კანდიდატი ბიძინა ივანიშვილი საქართველოში გიგანტური ჰიდროელექტროსადგურების მშენებლობის შეჩერებას არ გამორიცხავს.
როგორც მან საპარლამენტო უმცირესობასთან შეხვედრაზე აღნიშნა, გიგანტური ჰესების მშენებლობის საკითხი საფუძვლიანად უნდა განიხილონ.

მისი თქმით, რაღაც ნაკლი ყველაფერს აქვს, თუმცა, პლიუსები და მინუსები კარგად შედარებული და მოსახლეობასთან შეთანხმებული უნდა იყოს.

„არ გამოვრიცხავ, რომ გიგანტური ჰესების მშენებლობაზე უარის თქმა მოგვიწიოს, მაგრამ ამას კონკრეტული ანალიზი სჭირდება. ამაში მონაწილეობა მოსახლეობის ფართო ნაწილმა უნდა მიიღოს და საკითხი ამის მიხედვით უნდა გადავწყვიტოთ. შესაძლებელია მცირე ჰესების მშენებლობა, რომელიც ბუნებას ნაკლებად დააზიანებს“ - განაცხადა ივანიშვილმა.

პრემიერ-მინისტრობის კანდიდატმა მოსახლეობის გაზიფიცირებასთნ დაკავშირებითაც ისაუბრა და აღნიშნა, რომ თითოეულ ოჯახში გაზის შეყვანა რაც შეიძლება სწრაფად უნდა მოხერხდეს.

„ამისთვის ბიუჯეტში სახსრებს ვნახავთ. შევეცდებით, რომ საქართველოს ყველა მოსახლეს გაზის გამოყენების საშუალება ჰქონდეს“ - აღნიშნა ივანიშვილმა დეპუტატ აკაკი ბობოხიძის საპასუხოდ.